Prjóniprjón

Meira af Noro og Lopa

2009-12-02T11:49:00.000+01:00

Eva Gunnarsdóttir, Sturluhóli, prjónaði þessa "Noro hittir lopa" peysu handa Gunnari Snorra syni sínum. Hann er hæstánægður með peysuna! Eva notaði tvöfaldan plötulopa og fínan mohair þráð úr Nálinni.
Því má bæta við að ég vinn að því að uppfæra peysuna í fullorðinsstærðir - meiri fréttir af því fljótlega.
Stuðprjónakveðjur og þakkir til Evu fyrir að senda okkur myndirnar,
Ragga

Prjóniprjón er komin aftur!

2009-09-03T13:03:00.002+02:00

Jibbí!
Prjóniprjón, krúttlega prjónabókin fæst nú aftur.
Hægt er að nálgast hana í krúttlegu handavinnubúðinni Nálinni, Laugaveg 8 í Reykjavík - og nokkrum fleiri stöðum. Einnig er hægt að panta hana með því að senda póst á prjoniprjon@gmail.com, og fá hana senda heim.

Ég held ég svei mér fái mér prinsessutertu í tilefni dagsins.
Nú eða hekli eina.... :-)

Peysan Lóa

2009-08-02T14:15:00.003+02:00

Peysan Lóa er einföld, ofurlétt og mjúk stelpupeysa prjónuð úr Nammi. Peysan passar á 5-6 ára og í hana fóru ekki nema um 70g af Nammi. Að sjálfsögðu er peysan prjónuð að ofan - enda finnst mér ótrúlega mikill munur að prjóna peysur þannig, fæ ekki nóg af því. Ég er að vinna í því að gefa út uppskriftina - hana verður innan skamms hægt að nálgast ókeypis í Nálinni og hér á síðunni.

Prjón úti á landi

2009-06-24T01:01:00.031+02:00

Mér finnst rosalega gaman að koma í nýjar garnbúðir. Ég tala nú ekki um úti á landi. Það eru oft svo krúttlegar handavinnubúðir utan höfuðborgarsvæðisins sem bjóða uppá alls konar skemmtilegt bland í poka. Alltaf þegar ég er að ferðast erlendis eða úti á landi heima reyni ég að grafa upp og komast í garnbúðir á svæðinu. Svona til að kanna garn- og prjónamenninguna aðeins. Og til að skoða og þukla auðvitað og jafnvel að láta fallast í freistingu....

Hér fyrir neðan er listi yfir handavinnubúðir úti á landi, ásamt upplýsingum um staði sem selja handverk eða slíkt sem prjónafólki gæti þótt gaman að skoða. Ég læt símanúmer fylgja með þar sem það lá á lausu svo þið getið spurt um opnunartíma. Listinn er langur og það er greinilega af nægu að taka – engum þarf að leiðast eða verða uppiskroppa með garn í fríinu í sumar... Skipuleggið nú skemmtilegar garnbúða- og prjónaferðir um landið !!!!!! Fleiri ábendingar eru vel þegnar á prjoniprjon@gmail.com, það verður fært hér inn jafnóðum. Og þið ykkar sem hafið komið í einhverjar af þessum búðum eða staði megið endilega skrifa komment hér að neðan (eða senda tölvupóst) og láta vita hvernig ykkur fannst. Líka ef það er eitthvað annað á svæðinu sem gaman er að heimsækja, einsog krúttlegt kaffihús eða eitthvað sem þið viljið mæla með.

Þetta ásamt sundlaugaumsögn Dr. Gunna getur ekki klikkað – prjón og sund (og kannski nokkur söfn?) hringinn í kringum landið – er hægt að hafa það betra?

Gleðilegt prjónasumar og góða ferð í garnbúðirnar og handverksstaðina í ferðalaginu :-)!

Vesturland
*Á Akranesi er handavinnubúðin Ævintýrakistan til húsa að Skólabraut 31, þar er selt garn og fleira, og þangað ku vera mjög gaman að koma. S. 431 4242. Á Akranesi er líka Garnbúðin, Jörundarholti 9, s. 8682750, sem aðallega er netverslun en hefur líka opið eftir samkomulagi.
*Í Borgarnesi er skemmtileg garnbúð; Handavinnuhúsið, að Brákarbraut 3, s. 4371421. Ekki gleyma að koma við í Landnámssetrinu í Borgarnesi (ef tími er aflögu sko...).
Hannyrðasýning Katrínar Jóhannesdóttur "Þá er það frá…" er í Safnahúsi Borgarfjarðar Bjarnabraut 4, til 24. júlí 2009. Opin alla virka daga kl. 13 – 18, s. 8616800, hér er facebooksíða sýningarinnar.
Ullarselið á Hvanneyri, 12 km frá Borgarnesi, er ullarkapítuli útaf fyrir sig. Það er verslun og vinnustofa áhugafólks af Vesturlandi um ullariðn, þar er meðal annars kembt, spunnið, prjónað, flækt, ofið og spjaldofið (!). Þar fæst t.d. mjög falleg jurtalituð ull. S. 437 0077.
*Á Búðardal starfar og selur handverkshópurinn Bolli vörur sínar við þjóðveginn.
*Á Rifi á Snæfellsnesi er Katrín með Saumavinnustofu þar sem hún saumar í sængurföt og handklæði eftir pöntunum.
*Í Grundarfirði selur handverksfólk vöru að Nesvegi þegar skemmtiferðaskipin koma í land í sumar; 24, 27. júní, 11, 27, 28, 31. júlí, og 4, 8, 19. ágúst og 9. sept.
*Í Ólafsvík er Verslunin Þóra, Mýrarholti 12 með garn, og s. 436 1290, og svo er handverkssala í Pakkhúsinu, Ólafsvík, s. 433 6930.
*Í Stykkishólmi fæst garn í Sjávarborg, Hafnargötu 4, s. 438 1121. Prónavara og fleira fæst er í Gallerí Lunda, í Lionshúsinu, Aðalgötu, s. 438 1153, Versluninni Lost, Hafnargötu 1, versluninni Hjá Sæferðum og einnig er handverkssala í Gallerí Bragga.
Hér er að finna síðu um söfn á Vesturlandi.

Vestfirðir
*Heitt á Prjónunum er mjög skemmtileg garnbúð og kaffihús á Ísafirði, sem birtir girnilega rétti af matseðlinum reglulega á Facebook síðu sinni, s. 456-3210. Á Ísafirði er líka hægt að fá garn í Karitas, Hafnarstræti 11. Handverkshópur bæjarins rekur verslun "rétt við miðbæinn", og svo ku Hótel Ísafjörður bjóða uppá mikið úrval af Vestfirskum handverksvörum.
*Á Flateyri er handverkshópurinn Purka að Hafnarstræti 11, s. 456-7676.
*Í Bolungarvík starfar handverkshópurinn Drymla, í sama húsi og Náttúrugripasafn Bolungarvíkur (2 flugur í einu...).
*Á Þingeyri er handverkshópurinn Koltra, Hafnarstræti 6.
* Á Suðureyri er hópurinn Á milli fjalla sem hefur rekið verslun á sumrin við Aðalgötu.
* Í Árnesi, Trékyllisvík á Ströndum er handverkshúsið og safnið Kört, s. 451 4025.
Hér er síða um söfn á Vestfjörðum.

Norðurland
Fyrir norðan er ýmislegt spennandi í boði. Hér er sérstök síða um handverk á Norðurlandi Vestra, og hér er síða um söfn og setur á sama svæði.
*Á Hvammstanga er Verslunin Hlín, mjög skemmtileg hannyrða- og föndurbúð, Klapparstíg 2, s. 451 2515. Bardúsa á Hvammstanga er bæði verslunarminjasafn og handverkssala með vandað handverk úr héraðinu, Brekkugötu 4, s. 451 2747. Svo má kíkja í leiðinni á Selasetur Íslands, sem er í næsta húsi, Brekkugötu 2 (nú eða senda manninn með börnin þangað).
*Á Sauðárkróki er mjög krúttleg hannyrða- og föndurverslun: Kompan, Aðalgötu 4, s. 453 5499.
*Á Blönduósi er hið merka Textílsetur Íslands staðsett, það rekur handverkshúsið Búsílag í Glaðheimum, Brautarhvammi, þar sem hægt er að versla vandað og þjóðlegt handverk, og m.a. handspunnið og handlitað garn. Búsílag er með síðu á facebook. Á Blönduósi er einnig Heimilisiðnaðarsafnið, eina safn sinnar tegundar á Íslandi, sem sýnir heimagerða tóvinnu- og textílmuni og hannyrðir ýmiskonar. Halldórustofa er deild innan safnsins, kennd við Halldóru Bjarnadóttur, ótrúlega afkastamikla konu. Hún starfaði ötullega að málefnum og menningu kvenna, stofnaði og rak tóvinnuskóla, gaf út tímaritið Hlín, og safnaði og varðveitti ýmis konar munstur og uppskriftir – ásamt því að vera mikil hannyrðakona! Heimilisiðnaðarsafnið er til húsa í Árbraut 29, s. 452 4067, mjög flott og skemmtilegt safn fyrir alla með handavinnuáhuga ! Í safninu er líka hægt að kaupa kaffisopa (planta manninum með bók) með mögnuðu útsýni yfir ósa Blöndu.
*Á Siglufirði er hægt að kaupa garn í Aðalbúðinni, Aðalgötu 26. Og þar er líka Fríða með vinnustofu þar sem hún vinnur m.a. stóla úr garni og fleiru.
*Á Húsavík selur verslunin Esar garn. Garðarsbraut 5, s. 4641313.
*Á Akureyri er Quiltbúðin, Sunnuhlíð 12 með vörur fyrir bútasaum eins og nafnið bendir til en er einnig með gott útval af garni. S. 461 2241. Á Akureyri er líka hægt að kaupa garn í versluninni Hjá Beggu, Glerártorgi (sem einnig selur vefnaðarvöru, gjafavöru og fleira), eins er garn selt í versluninni Fold Anna, Hafnarstræti 85 s. 461-4120, og svo í Hagkaupum og fleiri stöðum - bara ekki með eins mikinn krúttfaktor og litlur búðirnar...
Í Kjallaranum í Hrísalundi (undir Samkaupum) er líka selt garn, og þar hefur verið prjónakaffi á þriðjudags- og fimmtudasgmorgnum.
*Í Hrafnagili verður Handverkshátíðin haldin í 17. sinn 7.-10. Ágúst 2009.
*Í Þingeyjasveit selja Handverkskonur milli heiða vöru sína í Goðafossmarkaði, Fosshól, Þingeyjasveit, s. 464-3323.
Hér er síða um söfn á Norðurlandi.

Austurland
*Á Eskifirði er bókabúðin Eskja, með fullt af skemmtilegu garni. Þær voru að eigin sögn fyrstar til að byrja með prjónakaffi á Íslandi (apríl, 2006) og segjast alltaf tilbúnar til að hjálpa til með prjónaskapinn ef þarf. Hér er Facebook síða Eskju.
*Á Norðfirði selur blómabúðin Laufskálinn garn, Nesgötu 3, s. 477-1212.
*Sólskógar, Reyðarfirði er fyrst og fremst gróðrarstöð, en einnig er þar handverksmarkaður og sala á bútasaumsefni.
*Á Stöðvarfirði er Salthúsmarkaðurinn sem er handverksmarkaður . Á Stöðvarfirði er líka Grafíksetrið Gallerí Snærós, Fjarðarbraut 42, s. 475 8931.
*Handverks og Hústjórnarskólinn Hallormsstað er jú í Hallormsstað.
*Á Hornafirði er handverkshúsið Handraðinn, þar sem m.a. eru seldar Humarlopapeysur.
*Og ekki keyra framhjá Þórbergssetri, safninu um Þórberg Þórðarson, á Hala í Suðursveit.
Hér er síða um söfn á Austurlandi. Á heimasíðu Fjarðarbyggðar eru linkar á vefmyndavélar á Austfjörðum, lengst niðri hægra megin (svona fyrir ykkur sem ekki komast austur í ár ;-)).

Suðurland
*Í Hveragerði er Hannyrðabúðin sf. til húsa að Sunnumörk 2, í sama húsi og Bónus, mjög fín handavinnubúð, s. 555 1314. Handverkshús er í Breiðumörk 24 þar sem Kaupfélagið var; Handverk og hugvit undir Hamri, það er bæði með heimasíðu og blogg.
*Á Selfossi er verslunin Skrínan með gott úrval af ýmis konar garni og handavinnuvörum. Eyrarveg 3, s. 482 3238. Alvörubúðin er á sama stað; Eyrarvegi 3, þar kennir ýmissa grasa, eitthvað af garni og fleiru, eina alvörubúðin í heiminum einsog segir á heimasíðunni þeirra,s. 892 4410. Bót.is einnig á Selfossi selur efni í bútasaum, en er líka með ýmis konar garn. S. 482 4241.
*Á Eyrarbakka er Gónhóll að Eyrargötu 51-53, með myndlistasýningar, markaði og kaffihús. S. 842 2550.
*Á Stokkseyri er svo Draugasetrið og þar fæst líka hin sjúklega góða humarsúpa Við Fjöruborðið (en reyndar ekki mikið garn í boði þar…).
*Þingborg er ullarvinnsla og verslun með handverk, staðsett 8 km fyrir austan Selfoss. Þar fer fram ullarvinnsla af ýmsu tagi, og sala á ull í ýmsum formum. Óspunnin ull, handspunnið og handlitað band, sérstakur Þingborgarlopi, ýmis konar prjónles, tölur og fleira úr beini, mjög spennandi verslun fyrir prjónafólk! S. 482-1027.
*Eins er alltaf gaman að koma að Sólheimum í Grímsnesi, þar er t.d. verslunin Vala (ekki garnbúð samt).
*Verslunin Garn.is er aðallega netverslun, en til húsa að Reykholti, tekur á móti saumaklúbbum og hópum eftir samkomulagi, s. 899 3546.
*Handverk af ýmsu tagi, prjónavörur og annað á Suðurlandi er að finna meðal annars á bændamörkuðunum á Gónhól, Eyrarbakka, í Gömlu Borg í Grímsnesi, í Björgunarsveitarhúsinu í Reykholti, Stöllum rétt við Geysir og á Flúðum í Ferðamiðstöðinni ásamt í Austurhlíð rétt hjá Laugavatni.
*Á Hvolsvelli er Gallerí Prjónles, Ormsvöllum 5. Þar er ýmis konar garn til sölu, m.a. sérinnflutt silki, kasmír ull, handmálaðar glertölur ásamt ýmsum fleiri vörum. s. 487-8093. Á Hvolsvelli er líka Sögusetrið, m.a. með Njálusýninguna.
*Í Vík er auðvitað gamla og góða Víkurprjónið, að Austurvegi 21, s.354-487-1250.
*Í Vestmannaeyjum selur verslunin Miðbær garn, einnig selur verslunin Framtíð lopa. Gallerý Heimalist við Strandveg selur ýmis konar handverk, lopavörur i meirihluta.
Hér er síða um Söfn og sýningar á Suðurlandi.

Reykjanes
*ÍKeflavík er Álftá, hannyrðaverslun að Ásabraut 10, s. 421-1322, og Gallerí Björg að Hafnargötu 2, Keflavík, selur handverk.
*Í Grindavík er hannyrðabúðin Aþena, og einnig er selt garn í versluninni Palóma.

Annars var þetta "allt"...
Gleðilegt prjónasumar!

Prjónympíuleikar!

2009-06-23T15:23:00.002+02:00

Í "rannsóknavinnu" minni um garnbúðir og áhugaverða hluti tengdu prjóni úti á landi kom ýmislegt skemmtilegt í ljós. Til dæmis að það voru Prjónympíuleikar á Ísafirði í fyrra þar sem m.a. keppt var í "boðprjóni" og "garðahraðprjóni"....:-)

Vonandi verða Prjónympíuleikarnir haldnir aftur í ár!

Prjóniprjón samkeppnin

2009-06-23T01:09:00.000+02:00

Fyrr á árinu birtum við hógværa auglýsingu á Prjóniprjónblogginu eftir frumsömdum prjónauppskriftum í Prjóniprjónsamkeppni. Viðtökurnar létu ekki á sér standa, og það er greinilegt að mikil gróska er í gangi í prjónaskapnum á Íslandi. Ein prjónakona vakti sérstaka athygli okkar, en það er hún Vilborg Ástráðsdóttir, sem sendi inn – ekki eina heldur nokkrar prjónauppskriftir, hver annarri skemmtilegri. Úr varð að „Litli skokkurinn“ hennar Vilborgar varð valinn sem „skemmtilegasta uppskriftin í anda Prjóniprjóns“ - og vinnur því þessa litlu samkeppni. Einföld, skemmtileg og frumleg uppskrift sem býður uppá marga möguleika. (Og hrikalega sæt flík !!).

Litli skokkurinn hefur nú hangið uppi í Nálinni um nokkurt skeið, og vekur mikla athygli Nálargesta. Uppskriftina er hægt að sækja á pdf skjali hér. Vilborg lætur sér ekki nægja að prjóna af lífi og sál, heldur bloggar um prjónaævintýrin sín líka – svona rétt á milli mjalta, barnauppeldis, heimilishalds og prjóns... Greinilega kjarnakona þarna á ferð.

Vilborg fær sent NAMMI í viðurkenningarskyni, handlitaða ullarbandið frá Röggu, upplagt í hyrnu til dæmis ;-).

Um Vilborgu:
Vilborg er sveitakona í húð og hár, sem býr við hálendisbrúnina með nokkrar skjátur á beit og þónokkur hross í túnfætinum. Prjónaáhuginn kemur frá ömmum og tengdamóður. Hún getur sjaldnast haldið sig við að prjóna nákvæmlega eftir uppskrift og þarf yfirleitt að prófa nýjar leiðir. Hefur sannfært börnin sín fjögur, strax frá fæðingu, að lopinn stingi ekki. Lesið um prjónaævintýri hennar á http://lopinn.blogspot.com/.

Í öðru sæti....

2009-06-22T22:23:00.000+02:00

Í öðru sæti Prjóniprjón-samkeppninnar kom þessi skemmtilega uppskrift að garðaprjónsvettlingum eftir Steinunni Þorleifsdóttur. Einföld, falleg og skemmtileg hönnun. Lítið og sniðugt prjónaverkefni í garðaprjóni - sem við Ragga erum jú alltaf soldið svag fyrir.... :-)

Núna er hásumar - en.... Því ekki að byrja núna á vettlingunum fyrir haustið, og hafa þá bara tilbúna, þá þarf engum að verða kalt á puttunum þegar fer að kólna :-) Einsog Elizabeth Zimmermann sagði: best er að gera vettlingana að vori frekar en að hausti, þá er ekki eins mikil hætta á því að stroffið verði of stutt einsog kannski gerist á haustin þegar manni er þegar orðið kallt á fingrunum.... :-)
Hér er uppskriftin að Garðaprjónsvettlingum Steinunnar á pdf formi.

Prjónum úti dagurinn

2009-06-22T21:54:00.000+02:00

Jæja, Prjónum úti dagurinn (World wide knit in public day)var haldinn hátíðlegur víða um Ísland í dag. Í Reykjavík var gengið í prjónandi skrúðgöngu frá Nálinni niður að Norræna húsinu þar sem prjónað var úti við góða stund. Eins var safnast saman og prjónað úti á Ísafirði, Akureyri, í Hveragerði og í Vík, svo eitthvað sé nefnt.
Gaman gaman.... :-)

Örverkefni

2009-06-15T22:48:00.000+02:00

Jæja, tíminn flýgur og frekar lítið er bloggað og prjónað um þessar mundir. Ég er búin að vera upptekin við að vera útá róló og að pota í moldina útí garði og bara að njóta þess að vera útivið í sumrinu. Sem er nú reyndar búið að vera í smá pásu hér í Sverige undanfarið - en NÚ hlýtur hitinn að fara að bresta á.... (koma svo, sumar!). Nokkur lítil verkefni líta þó dagsins ljós - aðallega örverkefni. Sem eru svo skemmtileg því maður nær að gera þau þó maður hafi eiginlega Engan tíma. Einsog legghlífar í xxsmall, úr hinu yndislega og ekologíska Marks & Kattens Eco baby ull, heklaður snudduhaldari úr bómullargarni frá Regnbågen, og húfa úr afgöngum í supersmall sem lyklakippa.

Ragga gaf mér einmitt svona heklaða húfulyklakippu (mjööög sæt) ásamt þessari glósubók sem ég nota til að skrifa uppskriftirnar mínar í. Og ég vil endilega hvetja ykkur til að skrifa niður prjónið ykkar í svona bók. Hvað þið prjónið og hvenær, úr hvaða garni og hvaða prjónfesta.... Mjög gaman að eiga og oft gott að kíkja í. Ég tala nú ekki um ef þið eruð að hanna eigin uppskriftir.

Og svo vil ég líka hvetja ykkur sem finnst þið ekki hafið tíma eða þolinmæði í prjónaverkefni að fitja uppá Örverkefni. Það er margt skemmtilegt sem getur komið útúr því, og er ekki síður útrás fyrir sköpunargleðina heldur en stærri og flóknari verkefni. Flott lausn fyrir okkur "tímalausa" prjónafólkið... :-). En svo þegar hægist um hjá mér (í næsta lífi kannski!?) langar mig að prjóna....svo margt. Og ekki í hamstrastærðum. Það kemur að því (minn tími mun koma!), en þangað til surfa ég á Ravelry og læt mig dreyma.... :-)

Um næstu helgi er svo Prjónum úti dagurinn á Íslandi - ætla ekki allir að vera með!?

P.S. ég hef heyrt að Nálin sé farin að selja Nammigarn.... ;-)

Amma óskast til að hekla húfu....

2009-05-31T23:09:00.000+02:00

Á síðunni Golden hook er hægt að hanna sína eigin húfu, og velja svo "ömmu" til að hekla hana fyrir sig... :-). Fyrir litlar 47 evrur, eða ca. 8000 Iskr.(!) á "gengi dagsins". Elskurnar mínar það er miklu skemmtilegra að hekla húfuna sína sjálfur - en þetta er krúttleg hugmynd.

Og á síðunni mormor.nu er hægt að kaupa prjónles - aðallega barnaflíkur, handprjónað af ömmum.
Sniðugt.

Hjá Netgranny hefur líka verið hægt að panta handprjónaða sokka af ömmum. Þeir eru annars að leita að einhverjum til að sjá um síðuna, einhver áhugasamur...?

Ýkt prjón

2009-05-22T16:29:00.001+02:00

Já, það má nú finna ýmislegt að dunda sér við. Hér má sjá þegar prjónað er með 1000 (já, eitt þúsund!) mismunandi garnhnyklum í einu. Svo úr verður dýna, að sitja á. Þarf bara að prjóna 4 garða - þá vips! komin dýna.... :-)

Þessi á allavega meira garn en ég. Flott skipulag annars að hafa það í svona glærum sekkjum.

Prjóniprjón á faraldsfæti

2009-05-13T15:12:00.000+02:00

Áhugi á prjóni er gríðarmikill þessa dagana og við prjóniprjónarar finnum fyrir því svo um munar. Ragga prjóniprjónari er á faraldsfæti þessa dagana og verður í Textílsetrinu á Blönduósi fimmtudaginn 14. maí, kl. 20, í góðum félagsskap Helgu Jónu handavinnukaupkonu í Nálinni.
Miðvikudaginn 3. júní er svo komið að því að heimsækja prjónara í Grindavík, en þar heldur hún Guðbjörg reglulega prjónakaffi í fallegu gömlu húsi, Flagghúsinu, Víkurbraut 2. Prjónakaffið byrjar kl. 20 og kaffi og kökur verða til sölu. Allir prjónarar og vinir þeirra eru velkomnir!

Af miðaldamúsum og fleiru.

2009-04-22T21:52:00.000+02:00

Ég smellti mér á prjónakaffi hér í miðbæ Stokkhólms um helgina. Hjá henni Maríu í garnbúðinni Marias garn á Södermalm. Mjög skemmtilegt og inspirerandi einsog alltaf. Gaman að sitja innan um allt þetta yndislega garn, gaman að fletta í öllum prjónabókunum hennar Maríu, og gaman að sjá hvað aðrir eru að skapa.

Í kaffinu voru gestirnir ekki af verri endanum, einsog þetta sæta miðaldamúsagengi á myndinni sem var mætt með eiganda sínum frá Uppsala til að prjóna í höfuðborginni.

Með mér í för var vinkona mín Pom, sem er nýfrelsaður heklari og æstur lærisveinn :-) - svo æst að hún er komin með hekl-blogg - þó hún hafi bara lært að hekla fyrir 3 vikum síðan !

Við eigum börn á sama aldri og hittumst oft þegar við sækjum eldri börnin á leikskólann. Röltum saman heimáleið með stoppi á róló eða heima hjá hvor annarri og reynum að hekla eða prjóna smá í sandinum útá róló eða útí garði eða heima á milli bleyjuskipta og þess alls. Stóru strákarnir leika úti eða inni, litlu ungarnir naga dót á gólfinu, og mömmurnar kyrja til skiptis: "Bíddaðeins krúttið mitt, mamma er að koma, bara eina umferð enn.... "
:-)

Fleiri meistarastykki úr Prjóniprjón

2009-04-15T23:13:00.000+02:00

Það er svo gaman að sjá öll meistarastykkin sem hafa verið prjónuð úr Prjóniprjón....
Þessa hrikalega sætu mýslu-kósiskó, og blóma-kósískóna gerði Margrét, eða Mangan á Ravelry.

Berglind Hafsteinsdóttir gerði Stroffhúfu, eða "Stroffhúfu á hinn veginn". Hún er prjónuð með Smart garni á prjóna 4. Berglind er með mjög skemmtilegt prjónablogg - hér.
Æðislega flott og skemmtileg útgáfa af Stroffhúfunni, Berglind!

Erla Sigurlaug heklaði Frelsishúfu og prjónaði Fléttuvettlingana: "Ég gerði einfaldan flatan þumal í staðinn fyrir þumaltungu, og svo saumaði ég pallíettur á kaðlana. Takk fyrir frábæra prjónabók, ég elska hana!".
Mjöööög flott Erla.... :-) !

Elín Siggeirsdóttir gaf tveimur barnabörnum Prjóniprjón, garn og prjóna í jólagjöf, og önnur þeirra; Katrín Ásta Karlsdóttir prjónaði grifflur eftir hugmynd úr bókinni. Æðislega einfaldar og flottar grifflur Katrín Ásta, sniðug hugmynd!

Heiðbjört Tíbrá prjónaði þessa skemmtilegu útgáfu af "Noro hittir lopa" peysunni, sem er eiginlega Ragg-garn hittir Smart.... :-). Gaman að sjá svona nýjar útfærslur af Prjóniprjón uppskriftunum.

Sendið okkur gjarnan fleiri myndir af Prjóniprjóninu ykkar á prjoniprjon@gmail.com.

Gleðilega páska

2009-04-09T11:48:00.001+02:00

Þessir hérna eru nú ansi krúttlegir. Uppskriftin er á www.garnstudio.com. Við óskum ykkur gleðilegra páska - með notalegum prjónastundum, góðu kaffi, páskasúkkulaði og fleiru slíku sem gyllir tilveruna...:-)

Garnorgía

2009-04-06T02:07:00.000+02:00

Ég fór á Syfestivalen hér í Stokkhólmi um helgina. Þetta er svona sölusýning um handavinnu og allt sem henni tengist. Fyrir prjónakonu þýðir það GARN í miklu úrvali. Alls konar garn.... Mjööög gaman. Þó það sé reyndar líka mjööög mikið af alls konar óspennandi dótaríi.

Ég fór með Höllu Dóru vinkonu minni, og við ákváðum að fara snemma á föstudagsmorgninum - m.a. til að sleppa nú við mestu örtröðina. En ónei. Þegar við mættum þarna rétt uppúr kl. 10 var brjáluð örtröð.... og rútur í stríðum straum fyrir utan sem úr helltist gráhærður massinn kominn hvaðanæva að af landinu. Vá, við Halla Dóra áttum fótum okkar fjör að launa! Skeinuhættastar voru svona velútilátnar konur með hækjur, eina eða tvær. En fyrir rest tókst þó með snarræði að brjóta okkur leið áfram með barnavagninn að vopni.... og svo rættist nú úr þessu er inn var komið, mjög gott samt að hafa barnavagninn til aðstoðar.

Á bloggi Sticka, handprjónasambandi Svíþjóðar má sjá myndir frá Syfestivalen.

Ég festi þarna kaup á einþættu ullarband frá Ullcentrum á Ölandi, sem mig langar að prjóna færeyska hyrnu úr. Það verður næsta eilífðarverkefnið mitt.... (!) þó þær séu nú ekki svo flóknar, mest garðaprjón, en útprjónaðir bekkir á köntum og í miðju, einsog t.d. á þessari hyrnu. Svo keypti ég líka bananagarn frá Indlandi! Garn unnið úr bananaplöntunni. Gróft en glansandi fallegt með einsog silkiáferð.

Á myndinni her fyrir neðan er líka garn unnið eingöngu úr mjólk. já - NÝMJÓLK! frá Viking-garn. Ég skil ekki alveg eðlisfræðina þar á bakvið... en hér má t.d. lesa skýringu á því. En þetta garn er allavega unaðslega silki.... ja, eða mjólkur-mjúkt. Eingöngu unnið úr mjólkurprótíni.

Dagatal með prjónaspeki

2009-03-31T01:31:00.000+02:00

Ég gaf sjálfri mér svona Page-a-day dagatal um prjón eftir "vinkonu" mína hana Stephanie Pearl-McPhee í jólagjöf. Mér finnst hún svo skemmtileg! Í dagatalinu má lesa eitthvað um prjón á hverjum degi: eitthvað fyndið, einhverja speki, einhvern fróðleik - eða álíka. Mjög skemmtilegt, enda er hún Stephanie svo fyndin og góður penni. Hún er kannski betur þekkt sem Kanadíski bloggarinn Yarn harlot. Hefur líka skrifað nokkrar bækur um prjón, allar á léttu nótunum eða í kategoríunni "Laugh-out-loud-book-about-knitting" :-). Og já ég fékk líka litla bók frá mér um jólin eftir hana: "Things I learned from knitting - whether I wanted to or not". Mjög skemmtileg líka....

Hér koma nokkur sýnishorn úr dagatalinu, klikkiði á myndirnar til að stækka þær. Held mér finnist best þetta frá 27.mars um að minnka húsverkin til að fá meiri tíma til að prjóna.... ;-). Og þetta með að hver handprjónuð flík sé kraftaverk er líka gott.

Besta bókin...?

2009-03-21T02:35:00.000+01:00

Einhver spurði hvaða bók væri best að útvega sér ef maður vill kynna sér bækur Elizabeth Zimmermann.
Tjahh..... Kannski er hægt að fá að kíkja í bækurnar hennar í einhverjum garnbúðum? En þær fást allavega hjá Amazon (bara muna að skattur bætist ofaná verðið til Íslands).

EZ gaf sjálf út 4 bækur. Fyrst kom Knitting without tears (1971), svo Knitters Almanac (1974), Knitting workshop (1981) og loks Knitting around (1989). Árið 2005 gaf svo Meg Swansen dóttir hennar út The Opinionated knitter (2005) að EZ látinni, en hún inniheldur fréttabréf sem EZ skrifaði og sendi út á árunum 1958 - 1968. Í henni er m.a. að finna hina frægu barnapeysu: Baby surprise jacket.

Knitting without tears er fyrsta prjónabók EZ og kennir og skýrir vel út ýmis grundvallar-, og nauðsynleg atriði í prjóni auk þess sem nokkrar uppskriftir eru í henni, þar á meðal hinn girnilegi Tomten jacket - sem er ofarlega á „To do“ listanum mínum.

En mín uppáhalds er held ég Knitters Almanac. Lítil og ódýr pocket bók með mjög skemmtilegu uppleggi; Ein eða nokkrar uppskriftir fyrir hvern mánuð ársins. Í bókinni eru margar skemmtilegar uppskriftir, og hún er alveg ekta EZ – með miklu en skemmtilegu „blaðri“ um prjón einsog henni einni er lagið. Soldið eins og talmál frekar en bókmál. Einsog talað sé til manns, mjög persónulega og skemmtilega skrifað – að mínu mati. Samt geta sjálfar uppskriftirnar verið mjög stuttorðar. Til dæmis nær „Baby sweater on two needles“ (February baby sweater) varla að fylla hálfa síðu – öll uppskriftin! Og myndirnar í bókinni eru fáar, svart hvítar og frekar óspennandi – algjör andstæða við prjónabækur í dag, en það er soldið hluti af sjarminum; það kemur ekki alveg í ljós við fyrstu sýn hvaða gullmola er að finna í bókinni. Stundum jafnvel ekki fyrr en maður er búinn að prjóna uppskriftina (!) Eða Googla hana.

Knitters Almanac byrjar mjög krúttlega:
„Once upon a time there was an old woman who loved to knit. She lived with her Old Man in the middle of a woods in a curious one-room schoolhouse which was rather untidy and full of wool. Every so often as she sat knitting by the warm iron stove or under the dappled shade of the black birch, as the season might dictate, she would call out to her husband: „Darling, I have unvented something,“ and would then go on to fill his patient ears with enthusiastic but highly unintelligible and esoteric gabble about knitting. At last one day he said, „Darling, you ought to write a book.“ „Old man“, she said, „I think I will“.
So she did.“

Og svo heldur hún áfram stuttu síðar með lesningu og uppskrift fyrsta mánaðar ársins.
„It is a cold and snowy January. The holidays are done with and Twelfth Night will be any day now: what better time to embark a long and lovely project? I have masses of thick unbleached natural cream wool, which with luck should work up into a really solid-looking Aran.“

En Janúar kaflinn fjallar einmitt um Aran peysur (svona einlitar ullarpeysur með ýmsum kaðlamunstum), og EZ segir frá sögu þeirra og gerð, að þær hafi verið prjónaðar öldum saman á eyjunum vestur af Írlandi, hvernig hver fjölskylda þar hafi haft eigið munstur, en að hún ætli sjálf að hannar hér eigin peysu með munstri einsog henni þykir best fara. Skýrir svo út í löngu (en skemmtilegu) máli hversu mikilvæg prjónfestan er fyrir þetta sem og önnur prjónaverkefni. Fyrir þá sem leiðist lesningin tekur EZ fram: „Should you find these Notes for Thinking Knitters“ intimidating, look at the end of this chapter. There you will find exact directions for making this classic aran.“

Mjög fallegt hringlaga sjal leggur EZ til að prjónað sé í júlí, þegar fjölskyldan fer saman í sumarfrí. Það hefur marga kosti skv. frúnni: fíngerð ullin tekur lítið pláss, stykkið er á hringprjónum svo ekki er hætta á að týna einum prjóni, og síðast en ekki síst: eitthvað verður að hjálpa þér til að halda sönsum á þeim erfiðu tveim sumarfrísvikum með fjölskyldunni sem framundan eru (!). Þetta er Pí-sjalið svokallaða, en einsog EZ skýrir út stendur ummál hrings í samband við þvermál hans með stærfræðilega fastanum pí (3.14). Og ummál hringsins tvöfaldast þegar þvermálið hefur tvöfaldast. Á prjónamáli; þegar prjónaumferðir hafa tvöfaldast þarf að tvöfalda lykkjufjöldann. Lykkjufjöldinn í sjalinu er því tvöfaldaður eftir 3, 6, 12, 24 osfrv umferðir. Mjög fallegt, en stórt sjal.

Í maí stingur frúin uppá að fitjað sé upp á vettlingum. Því það er svo miklu betra að prjóna þá í rólegheitunum á vorin þegar nægur tími er enn til vetrar, heldur en að vera að fitja uppá þeim í flýti í fyrstu kuldunum að hausti – þá er hætta á að stroffið verið of stutt.... Í júní eru húfur á dagskrá, því það er „Good summer project“, einsog Ganomy hat, Maltese fisherman hat, og Three cornered hat sem skv. EZ hefur jafnmörg líf og köttur – eftir því hvernig hann er borinn: með eitt hornið fram, eða með slétta hlið fram, eða með hornin falin inní húfunni.... :-)

Mér fannst þessi bók æðisleg hugmynd.... Prjónuð flík fyrir hvern mánuð ársins – svona prjónabók langar mig að gera! Mín bók myndi samt aldrei byrja á fullorðins Aran peysu eða álíka stóru dæmi í Janúar. Mér finnst gaman að prjóna, en hef þó ekki óþrjótandi þolinmæði (þó prjónið og blessuð börnin hafi teygt svolítið á henni) Ég myndi kannski frekar byrja á.... vettlingum? Eða vesti...!? En ég ætla allavega ekki að hafa síðar nærbrækur í minni – en kannski svona litlubarna buxur, einsog soldið víðar jógabuxur...? Mjög mjúkar þá. Og svo myndu vera sætar húfur líka....

Já, ljúft er að láta sig dreyma. En nú er nóttin komin hérna í Stokkhólmi, og best að beita sig smá sjálfsaga og ekki prjóna eða vera að blogga um prjón heldur do the right thing og skríða í bólið (ég mun þakka sjálfri mér það þegar liðið vaknar í fyrramálið og allt fer á full swing).
Heyrumst seinna,
God natt!

Má ég kynna..... Elizabeth Zimmermann

2009-03-01T15:30:00.000+01:00

Ég hef eignast margar vinkonur í gegnum prjónið, þessa heims og annars, þ.e. ljóslifandi vini hér og nú, vini á netinu, og svo „framliðna vini“. Ein af þeim er Elizabeth Zimmermann (EZ). Eða hún er eiginlega meira hetjan mín, svona prjónahetja, enda var hún prjónagúrú í lifanda lífi og nú prjónagoðsögn. Hún var fædd 1910, mikil prjónakona, og skrifaði bækur um prjón. Svona notalegar bækur þannig að manni finnst maður vera í kaffi hjá gamalli vinkonu þegar maður les þær. Og allar eru þær miklar metsölubækur.

Ég heyrði líklegast fyrst talað um EZ í sambandi við Baby surprise jacket (BSJ), garðaprjóns-barnapeysuna sem er prjónuð í einu flötu stykki sem svo er brotið saman einsog origami, og kemur þá hin krúttlega hneppta peysa í ljós. Það er líklegast frægasta stykkið hennar, og vinsælasta ef marka má prjónasamfélagið www.Ravelry.com, en þar eru um 6650 prjónarar búnir að snara BSJ af prjónunum, og birta mynd af afrakstrinum. Næst-vinsælasta hönnun hennar er Baby sweater on two needles (February baby sweater) með 2400 stykki skráð á Ravelry, síðan kemur Modular Tomten jacket (1016 stykki), Pi-shawl (835), og svo Mitered mittens, Ganomy hat, Seamless yoke sweater, Seamless raglan sweater, Elizabeth percentage sweater, Mystery mittens.... og svo mætti lengi telja. Allt snilldarverk, og tímalaus hönnun (nema kannski helst prjónuðu ullarnærbrækurnar – mig langar ekki í þær....).

EZ er líka sú sem fyrst kynnti prjónaðan Möbíus til sögunnar, og prjónað I-cord, eða prjónað band, sem einmitt er kennt hér neðar á Prjóniprjón-blogginu. Af hennar verkum hef ég sjálf prjónað Baby surprise jacket, Baby sweater on two needles, Ganomy hat, og hitt er nánast allt á „to do“ listanum mínum sem bara lengist og lengist.... (svo mikið að prjóna- svo lítill tími, kannast einhver við það...!?)

Það sem gerir EZ svo sérstaka er bæði hvernig hún lítur á prjón, hinar einstöku prjónauppskriftir hennar, og svo skrifin hennar um prjón, sem eru soldið skemmtilega gamaldags, en full af húmor og hlýju. Hún hvetur einmitt til að prjóna sjálfstætt (með hjálp prjónfestuprufu), hvetur prjónara til að upplifa sköpunargleðina, og einfaldlega að finna gleðina við að prjóna. Og svo talar þessi elska svo fallega um íslensku ullina: „We use Icelandic wool for most of our scarves, as it is truly the world warmest wool,...“.skrifar hún í bókinni Knitting around, og hún notaði greinilega íslensku ullina mikið í prjónið sitt.

Ég fór í mikinn EZ ham hér um daginn og pantaði tvær af bókunum hennar; „Knitting around“ og „The Opinionated knitter“ til að bæta í safnið mitt - OG dvd með upptökum frá sjónvarpsþáttum með henni um prjón frá 7. áratugnum (!). Bækurnar komu með póstinum í vikunni og ég bara beið eftir Tækifærinu. Það kom svo í gær þegar minnsta músin á heimilinu fór útí vagn að lúlla og pabbinn tók Skarphéðinn 4ra ára með sér að keyra stóru stelpuna okkar útá flugvöll, en hún var að fara í heimsókn til vinkvenna sinna sem eru að vinna í frönsku ölpunum (þettað er ungt og leikur sér). Þá sá ég mína sæng útbreidda, veiddi garn við hæfi uppúr stashinu mínu; íslenska ull í undurfögrum gráum tónum og fitjaði upp á Mystery mittens. Ný og spennandi EZ uppskrift á prjónunum, kaffibolli, súkkulaði og bókina hennar Elízabetu við hendina... Mmmmmmm....... quality time :-).

:-)

Opnustúlkan spjallar um prjón í hverfisblaðinu

2009-03-01T14:52:00.000+01:00

Um daginn var undirrituð opnustúlkan í vikulega hverfisblaðinu okkar hérna í Vallentuna, N-Stokkhólmi..... :-) Klikkið á þennan link og flettið á bls. 12 -13 ef þið viljið kíkja á viðtalið "Stickning för själen", sem þýðist beint "Prjón fyrir sálina", en inntakið er hversu góð áhrif prjónið getur haft á mann.

Meiri prjón - meiri gleði!

:-)

Meira frá prjóniprjónurum

2009-02-27T09:52:00.000+01:00

Takk innilega fyrir að senda okkur myndirnar af ykkar frábæru prjóniprjónaverkum.

Hér er gullfalleg hyrna eftir Gyðu Björgu Elíasdóttur (dóttir hennar var svo heppin að fá hana í afmælisgjöf). Mér sýnist garnið vera Kauni(?):

Hér er svo æðisleg peysa eftir Birgittu Hassell, gerð með "peysan sem passar á alla - aðferðinni". Eigandinn og fyrirsætan fékk að velja sér garnið - það er léttlopi og fallegur fánaþráður með til skrauts. Svo bætti Birgitta við götum fyrir þumlana, eins og sést á myndinni. Það var að beiðni eigandans... svona á einmitt að gera, breyta og bæta svo útkoman verði alveg eins og manni sjálfum finnst flottast - enda sjáiði hvað dóttir hennar Birgittu er glöð á myndinni!

The cute rectangular hat

2009-02-18T12:50:00.001+01:00

This cute, simple and quick recipe from Prjóniprjón is now available in english for free. It‘s a nice project even for beginners:

Yarn: Dale baby ull or any other soft wool for needles size 3 (US3), 3-4 colors
Needles: 40 cm (15 in) round no. 3 (US 3), a single needle no. 3 (US 3), for the double binding off).
Sizes: 1-3 months (4-6 months) 7-12 months
Cast on 80(100)110 st. Connect in a circle. Work 4.5cm (1.8 in). Purl one row. Change color. Knit until the hat measures 16(18.5)21cm (6.2(7.3)8.3 in). Turn the hat inside-out and bind off accordingly: hold both ends of the circular needle in the left hand and the single needle in the right hand. Knit 2 stitches together with the single needle, two times. Now you should have two stitches on the single needle. Slip the first stitch over the second. Knit the next two stitches together, slip over, etc. This way you close the top of the hat while binding off. Make two pom-poms in cute colors and fasten on the corners. It doesn‘t get much cuter than this!

About this recipe:Ragnheiður Eiríksdóttir 2008

Please distribute with reference to designer

The recipe was published 2008 in Prjóniprjón (icelandic)

Hin meinholla og ódýra súpa prjónarans

2009-02-18T09:50:00.000+01:00

Ég eldaði "Hina meinhollu og ódýru súpu prjónarans" í gær - Mmmmm....!!!

Æðislega góð svona á köldum vetrardegi. Og hollustan sjálf uppmáluð. Uppskriftin er á blaðsíðu 7 í Prjóniprjón, og einmitt í okkar anda: einföld en samt alveg brilljant, og hægt að elda af fingrum fram eftir því sem andinn (og ísskápurinn) blæs í brjóst :-). Og svo eldar hún sig sjálf þessi elska þegar búið er að henda grænmetinu útí hana. Svo kósí að sitja og prjóna á meðan hún mallar á hellunni (muna bara að loka inní þvottahús svo ófrágengni þvotturinn mæni ekki á mann á meðan).

Eldaði líka þessa spínatböku (mikil hollusta í gangi hér!), mjög góð og einföld, með fetaosti. Sleppti reyndar alveg dillinu - sem er uppháhalds krydd Svíanna, átti ekkert svoleiðis.

Með bestu mmmmmatarkveðju.... :-)

Meistarastykki uppúr prjóniprjón

2009-02-15T16:07:00.000+01:00

Hér koma nokkrar myndir sem prjónarar hafa sent okkur af því sem þeir hafa prjónað uppúr Prjóniprjón. Mjööög gaman að sjá !!!
Endilega sendið okkur fleiri myndir af Prjóniprjón-meistarastykkjunum ykkar á prjoniprjon@gmail.com

Erla Sigurðardóttir sendi okkur mynd af Stroffhúfu. Húfan er svört og hvít með hekluðu blómi. Mjög flott. Svo sendi hún mynd af stroffhúfu sem endaði sem Stroff-eyrnaband þegar fjólubláa garnið í hana kláraðist..... :-) - kemur æðislega skemmtilega út ! Síðast er mynd af "Glaðlegu pilsi á stelpuskott", rosalega flott með svona silfurkanti hekluðum á neðst. En eigandinn - Vera 4ra ára - fæst því miður ekki til að vera í pilsinu !!!

C´est la vie.... Við hjá Prjóniprjón könnumst við svona :-s
Takk fyrir flottar myndir Erla!

Valgerður Sif sendi okkur mynd af sæskrímslinu Casper:

"Ég fékk hina yndislegu prjónabók ykkar í gjöf frá manninum mínum heittelskaða og hef ekki hætt að flétta henni fram og til baka síðan.Sonur minn pantaði Vallentínus bangsa sem ég gerði heiðarlega tilraun til að gera en ennþá er ég svolítið óreynd í prjónamálum og greyið Valentínus mistókst svona herfilega og breyttist í eitthvað undarlegt sæskrímsli. En sonurinn þykir svo vænt um hið undarlega sæskrímsli og var hann skýrður Casper. Ég ákvað að senda ykkur mynd af Casper kallinum, passið þó að kafna ekki úr hlátri hehehe....."

Þetta er ótrúlega flott útkoma úr Vallentínusi :-) - Meiriháttar skemmtilegt!!!

Hvítt pils með krónuprjóni

2009-02-09T16:25:00.000+01:00

Jæja þá er ég komin af fjöllum. Við fjölskyldan vorum í sænsku fjöllunum, á skíðum og hafandi það kósí í bústað og svoleiðis. Það var yndislegt, allt á kafi í snjó, allt hvítt… Með í för var hvítur plötulopi – vel í stíl við vetrarumhverfið - sem ég prjónaði tvöfaldan í hnésítt pils, unaðslega hlýtt og krúttlegt.

Þegar ég var búin að prjóna pilsið þvoði ég það og lagði til þerris á sléttum fleti þegar ég kom heim. Það er lærdómur númer tvö – á eftir prjónfestuprufunni – sem hefur tekið mig soldið langan tíma að ”meðtaka” og þróa með mér sjálfsaga að gera. En getur algjörlega gert kraftaverk fyrir prjón. Og pilsið mitt sem var soldið beyglað varð allt í einu svo jafnt og slétt og yndislega fallegt… ohh :-).

Þar sem pilsið lá til þerris í þvottahúsinu var ég alltaf að læðast þangað inn og dást að stykkinu – (svona einsog konur gera gjarnan með nýfædda barnið sitt!), og það var svo góð lykt eitthvað í þvottahúsinu – svona af blautum lopa. Svona tilfinning einsog að koma ”heim” í fjósið… eh, eða þannig, ég hef reyndar aldrei búið í fjósi. En bara svona kósí sveitalykt. Aðrir fjölskyldumeðlimir deildu reyndar ekki ánægjunni með ilminn. Unglingurinn: ”Oj, enginn á eftir að vilja sitja við hliðina á þér í lestinni þegar þú ert í þessu…” og álíka, en ég lét það sem vind um eyrun þjóta (enda veit ég að lyktin er bara af rennblautum lopa). Og ég er nú þegar búin að vera í ”fjósapilsinu” tvisvar á opinberum vettvangi útí bæ - Og hef bara fengið hrós fyrir stykkið, en enginn fitjað uppá trýnið útaf lykt :-).

Krónuprjónið neðst í lopapilsinu er prjónað eftir mynsturmyndinni fyrir krónuprjónspilsið í Prjóniprjón bókinni (reyndar fækkað um eina lykkju, síðustu sléttu lykkjunni sleppt) þannig að hver krónuprjóns-endurtekning eru 23 lykkjur. Rann þá upp fyrir mér að krónuprjónsmunstrið í pilsinu á myndinni í bókinni er með mjórri bekkjum / endurtekningum heldur en gefið er upp í teiknaða munstrinu !! Það eru s.s. mjórri og fleiri endurtekningar á pilsinu á myndinni en í teiknaða munstrinu. Svo ég setti inn leiðréttingu við færsluna hér neðar á blogginu um krónuprjónpilsið. Nýja lopapilsið mitt er s.s. prjónað eftir mynsturmyndinni í Prjóniprjón: Mjög fínt - en með breiðari (og færri) bekkjum en krónuprjónspilsið á myndinni í bókinni.

Hér pósar Hrefna Birgisdóttir í lopapilsinu ljúfa.

Viltu vera með í Prjóniprjón ?

2009-01-25T10:07:00.000+01:00

Við Ragga erum svo ánægðar með hvað það er mikið að gerast í prjónamennskunni á Íslandi, og töluðum um að gaman væri að fanga þessa grósku á einhvern hátt. Hér kemur okkar framlag til þess:

Sendu okkur mynd og uppskrift að eigin prjóna- eða hekl hönnun á prjoniprjon@gmail.com - skemmtilegustu hugmyndirnar verða birtar á Prjóniprjón-blogginu og/eða í næstu Prjóniprjón bók!

Skilafrestur er 15.mars 2009.

Vertu með í Prjóniprjón!

Leiðrétting á krónuprjónsmynstri

2009-01-25T10:06:00.000+01:00

Hér kemur leiðrétting á krónuprjónsmynstrinu í krónuprjónspilsinu í bókinni okkar !
Munstrið á að líta svona út (ef þú vilt hafa það nákvæmlega einsog í pilsinu á myndinni í bókinni):

Krónuprjónspilsið á myndinni í Prjóniprjón er sem sagt með krónuprjóni neðst með 17 lykkja endurtekningu. En teiknaða munstrið sem gefið er í bókinni hefur 1 reit meira af öllum munsturgerðarlykkjum. Það er líka krónuprjón, en bekkurinn eða endurtekningarnar eru þá breiðari, (sem passar svosem líka vel í pils – einsog þetta lopapils) heldur en á myndinni í bókinni.

Lykkjufjöldinn neðst á krónuprjónspilsinu í bókinni þarf að ganga upp í 17. T.d. 221 lykkja (þá eru 13 endurtekningar á krónuprjóninu) eða 238 lykkjur (14 endurtekningar) ef notað er garn í svipuðum grófleika og í bókinni. Það er alveg óhætt að auka vel út neðst í pilsinu á undan krónuprjóninu, það kemur fallega út, bara það sé gert jafnt yfir umferðina. Í þessu hvíta pilsi er aukið út um 1 lykkju í 4.hverri lykkju neðst á undan krónuprjóninu.

Krónuprjónspilsið

2009-01-25T09:48:00.000+01:00

Ég fékk tölvupóst í vikunni um krónuprjónspilsið þar sem spurt var hvaða mynstur væri í slétta prjóninu á milli skásettu randanna í pilsinu. Þetta eru bara nokkrar brugðnar lykkjur sem mynda einsog kross. Ef maður vill "piffa aðeins uppá" slétt prjón - hvar sem er - er einmitt upplagt að smella inn nokkrum brugðnum lykkjum í það.

Ég prjónaði s.s. nokkrar brugðnar lykkjur þarna sem mynda einsog kross: Í 1. umferðinni er 1 brugðin lykkja, í 2. umferð eru 3 brugðnar beint yfir þeirri fyrstu, og í 3.umferð er aftur 1 brugðin í miðjunni. Krossinn er prjónaður þannig að hann lendi ca. í miðjunni á milli skásettu randanna, en þetta þarf nú ekki að vera svo akkúrat.... Smelltu á myndina til að skoða þetta betur, þá sést hún í stærri upplausn.

Bylgjan á skilunum á milli slétta prjónsins og krónuprjónsins kemur af sjálfu sér, myndast svona útaf krónuprjóninu.

Prjónína

2009-01-24T23:00:00.000+01:00

Ég er svo fram úr hófi vel gift og kom það berlega í ljós um nú um jólin. Jólagjöfin mín frá eiginmanninum var kind að eigin vali af vefsetrinu kindur.is. Ég valdi flottustu kindina sem ég sá, strax á aðfangadagskvöld og fékk hún nafnið Prjónína - það var valið eftir snögga samkeppni meðal fjölskyldumeðlima sem Sindri sigraði með yfirburðum enda nafnið ótrúlega flott og viðeigandi. Prjónína býr á Snæfellsnesinu hjá afskaplega góðu fólki. Sjáiði bara hvað hún er fín!

Vá...!

2009-01-21T22:40:00.000+01:00

Jæja, þá er ég komin aftur heim í Sveppaskóg hér í Svíþjóð eftir áramót og huggulegheit með vinum og fjölskyldu á Íslandi í janúar.

Og vá.... hvað það var gaman að koma til Íslands og sjá alla gróskuna sem er í gangi í prjónaskapnum heima !!! Og vá hvað Prjóniprjón hefur fengið góðar viðtökur...!!! Salan hefur gengið framar villtustu vonum, og bókin er nú í þessum töluðu uppseld - eina ferðina enn. En örvæntið eigi, hann Hlynur og félagar í Pixel eru á fullu að vinna í næstu prentun, og bókin mun von bráðar verða til sölu aftur í Nálinni, Laugaveg 8.

Mjög gaman að hitta alls konar fólk sem hafði keypt bókina eða fengið hana í jólagjöf - og var að biðja mig um að árita hana...!!! Mér leið bara eins og kvikmyndastjörnu :-).

Við Ragga (prjónuðum - auðvitað!) og ræddum um að fanga þessa grósku og grasrót sem er í gangi í prjóninu heima - meir um það seinna - æsispennandi dæmi - fylgist með hér á Prjóniprjón blogginu.... :-)

Aðferð til að fella laust af

2009-01-21T22:30:00.001+01:00

Hér sýni ég pottþétta aðferð til að fella laust af - það er ekki hægt að fella fast af með þessari aðferð. Ég nota þessa aðferð alltaf þar sem mikilvægt er að affellingin verði laus, einsog í hálsmáli á peysum, í þríhyrnunni - eða eiginlega hvar sem er.

1. prjóna 2 lykkjur venjulega yfir á hægri prjón
2. stinga vinstri prjóni framan í báðar lykkjurnar
3. prjóna lykkjurnar tvær saman með hægri prjóni

Tónaflóð um jól

2008-12-24T00:25:00.000+01:00

Harðkjarnaprjónarar eins og við Halldóra látum nú ekki verk úr hendi falla þó að það þurfi að sjóða hangiket og steikja laufabrauð. Jólin eru dásamlegur tími til að prjóna - sérstaklega núna með alla þessa dásamlega samfelldu frídaga. Til gamans birtum við hér texta sem prjónarar geta raulað við jólaverkin:

Prjóniprjón
Lag: Man ég þá er hátíð var í bæ

Prjóniprjón, prjóniprjóni
Prjóniprjón, prjóniprjóni
Ég fit‘jupp og prjóna og felli svo af
Peysan verður tilbúin í dag

Prjóniprjón, prjóniprjóni
Prjóniprjón, prjóniprjóni

Með lykkjum úr lopakemst lundin í lag.
Langar svo að prjóna meir í dag
Það er svo ósköp örvandi að prjóna
húfur, peysur, sokka, vettlingaaaa

pakkana fá össur, geir og jóna
við komum þar með þjóðlífin‘í laaaag

Prjóniprjón, prjóniprjóni
Prjóniprjón, prjóniprjóni

Ég fit‘jupp og prjóna og felli svo af
Peysan verður tilbúin í dag – peysan verður tilbúin í dag

Prjónum allsstaðar
Lag: Jólin, jólin allsstaðar

Prjónum, pjónum allsstaðar
Með mohairhnykla og mæliband
Heklunálar og herfur tvær
brátt verða sokkar með aðskildar tæææær

Prjónalíf er ljúft og gott
ég fitja upp á eitthvað flott
Brátt ég kemst í úrtökurnaaar
Ég felli stoltur af.

Textarnir eru eftir Röggu - en stjúpbróðir hennar, hinn gullinhærði Högni Egilsson, söngvari og lagasmiður í Hjaltalín, frumflutti þá í útgáfugleði Prjóniprjóns í Nálinni, þann 5. des 2008. (Myndin að ofan birtist í grein um jólapeysur í Seattle times. Við Halldóra vonumst til að hitta þessa töffara einn góðan veðurdag og ræða prjónaskap við þá)

Snjókorn

2008-12-24T00:24:00.000+01:00

Jæja elskurnar.
Hér kemur eitt heklað jólasnjókorn handa ykkur héðan frá mér í Svíþjóð. Vissu þið að engin snjókorn eru eins? Og að öll eru 6 arma. Það er ákveðin magí fólgin í því - einsog í prjóninu.... :-) Og hafiði hugsað útí hvað snjókornin eru ótrúlega falleg ? Kíkiði á þetta snjókornamyndagallerí og sannfærist. Og hér má finna fróðleik um snjókorn, svona fyrir þá forvitnu. Fyrir þá óþolinmóðu er hér síða þar sem má skapa snjókorn með gömlu klipp-út-í-pappír aðferðinni - onlæn.

Það er ekki eitt einasta ekta snjókorn hér að sjá utandyra, en stillt og fallegt veður. Sit hér og hlusta á Bubba á tónleikum í netútvarpinu mínu - hár kósífaktor.

Aðfangadagur verður tekinn frekar snemma með hrísgrjónagraut á brunchtíma hjá Helene, sænskri vinkonu sem býður okkur hele familjen - fimm manns - á hverju ári í grjónagraut á aðfangadagsmorgun (með möndlu of kors). Hún býr ásamt manni og barni í eins herbergja íbúð (!) í miðborg Stokkhólms (stofan og svefnherbergið er herbergIÐ í íbúðinni!). Þegar ég kem til hennar verður mér oft hugsað til ömmu minnnar sem bjó alla tíð með eiginmanni og 4 dætrum í 2ja herbergja risíbúð á Hverfisgötunni. Og aldrei var kvartað yfir plássleysi. Ekki finnst manni plássleysið heldur vera til baga hjá Helene þegar maður kemur þangað, það er alltaf jafngaman hjá henni.

Svo eru það sænsku jólin klukkan 15 - með tilheyrandi sjónvarpsdagskrá, og svo kemur jólasveinninn með smá pakka handa yngsta fólkinu að sænskum sið - akkúrat þegar pabbi fer út að kaupa blaðið (árans óheppni að hann missi af þessu ár eftir ár), og svo eru það íslensku jólin klukkan 18, með messu í netútvarpinu (sem reyndar byrjar ekki fyrr en kl. 19 að staðartíma) og svo pakkasúpan eftir það.

Ég óska ykkur gleðilegra jóla - með prjóni, hekli - eða jafnvel Prjóniprjóni :-). Ég óska að Prjóniprjón gefi ykkur eins margar ánægjustundur og hún hefur gefið mér. Ég óska að þið finnið gleðina í því smáa.... Til dæmis í því að læra eitthvað nýtt. Eða í því að fitja upp á nýju verkefni.... kannski handa einhverjum sérstökum. Eða að fella af eftir langt prjón og upplifa "dýrðina". Eða að klæða litla fingur í vettlingana sem þið hafið prjónað.

Já ég óska ykkur jóla með litum og mjúkum lykkjum (ég veit - væmið - en hey það eru jólin!).
Verum glöð og góð við hvort annað,
og heklum einsog eitt snjókorn... :-)

Gleðileg prjónajól!

Þetta snjókorn er upplagt fyrir þá sem hafa grunnkunnáttu í hekli. Aðrir gætu átt á hættu að verða soldið pirraðir... Þeim er frekar bent á klipp-út-í-pappír aðferðina.

Í svona snjókorn er notað fíngert bómullargarn (einsog amma notaði til að hekla fíngerðu dúkana sína), og fíngerð heklunál. Ég notaði 1.75 mm heklunál og svona dúkagarn. Ég heklaði perlur inn hér og þar. Þá verður fyrst að þræða allar perlurnar sem nota á á garnið. Draga svo 1 perlu í einu að heklunálinni og halda áfram að hekla - þá er komin perla í spilið :-). En snjókornið er líka mjög fallegt án þess að hafa perlur.

1. Heklið 6 loftlykkjur, tengið í hring.
2. Heklið nú 6 boga: [6 loftlykkjur, 1 fastalykkja í hringinn úr fyrstu umferð], alls 5 sinnum. Síðasti boginn er heklaður svona: 3 loftlykkjur, 1 stuðull í hringinn.
3. [Heklið 4 loftlykkjur, 1 fastalykkju í bogann úr fyrri umferð], endurtakið í hvern boga.
4. Nú er 1 af 6 örmum snjókornsins heklaður. *Heklið 8 loftlykkjur, tengið með keðjulykkju í 9. lykkju frá heklunál. Heklið 12 lykkjur, tengið með keðjulykkju í 10. lykkju frá heklunál. Heklið 14 loftlykkjur, tengið með keðjulykkju í 12. lykkju frá heklunál. Heklið 12 lykkjur, tengið í 13. lykkju frá heklunál (þetta var toppurinn á oddi snjókornsins). Heklið 12 lykkjur, tengið í 13. lykkju frá heklunál. Heklið nú keðjulykkjur í næstu 3 loftlykkjur (í átt að miðju snjókornsins). Heklið 10 loftlykkjur, tengið með keðjulykkju í 11. lykkju frá heklunál. Heklið keðjulykkjur í 3 næstu loftlykkjur (í átt að miðju snjókornsins). Heklið 8 loftlykkjur tengið með keðjulykkju í 9. lykkju frá heklunál. *
Heklið nú 4 loftlykkjur, tengið með keðjulykkju í 2. lykkju frá heklunál, heklið 2 loftlykkjur, tengið með keðjulykkju í fastalykkjuna úr fyrri umferð. Heklið svo annan arm, þ.e. frá * til *.
Endurtakið þetta þar til snjókornið hefur fengið armana sína 6.
Gangið frá endum.

Svo þarf að stífa snjókornið. Teiknaðu fyrst jafna 6 arma stjörnu á blað, og festu það á flatan kork, pappa, eða annað sem hægt er að stinga títuprjónum í. Þetta verður notað sem mót til að fá snjókornið jafnt. Festu svo plastfilmu yfir pappírinn.
Snjókornið er gert stíft með því að blanda vatnsleysanlegu trélími við smá vatn til að þynna það og fá það meðfærilegt. Bleytið snjókornið vel í blöndunni, og leggið það svo á plastfilmuna og pinnið niður með títuprjónum í alla anga sem eiga að standa út. Látið þorna yfir nótt.

Hengið í eldhúsgluggann eða á jólatréð - og gleðjist yfir hinu smáa... :-)

Vantar þig jólagjöf fyrir prjónara ?

2008-12-22T18:53:00.000+01:00

(Já aðra en Prjóniprjón sko). Sá þetta á vefnum prjona.net. En það er að gefa kind í fóstur!!

Frábær hugmynd.... :-). Viðtakandinn fær umgengnisrétt við kindina sína, þ.e. má kíkja í heimsókn nokkrum sinnum á ári, fær að gefa henni nafn, getur fengið sent póstkort af henni - og síðast en ekki síst - fær ullina af henni! Og þá er já "bara" að taka upp rokkinn og byrja að spinna. Panta hér: www.kindur.is.

Að prjóna í hring en samt ekki....

2008-12-21T14:25:00.001+01:00

Hér kemur smá prjónakennsla. Einföld leið til að prjóna band - í hring en samt á 2 prjónum (lofuðum að sýna þetta hér á blogginu). Þetta er aðferð sem hún Malin í Storkinum kenndi mér yfir afgreiðsluborðið fyrir mörgum árum. Svona band er t.d. í ungbarnahúfunni í Prjóniprjón, líka í rófunum á kisunum, og í Bjálfa.

Til að prjóna band á ungbarnahúfu er ágætt að fitja upp 5 lykkjur á sokkaprjóna 3.5 með garn sem passar. Bandið er svo prjónað með 2 prjónum í hring, svona:

Snúðu alltaf réttunni að þér, dragðu bandið þétt frá vinstri hlið aftur fyrir stykkið og prjónaðu með því frá hægri til vinstri einsog venjulega. Þetta er endurtekið þannig að bandið vex og verður holt að innan - algjört hókus pókus! Prófaðu bara.

Uppáhalds- uppáhalds....

2008-12-20T01:24:00.000+01:00

Ég á margar uppáhalds-prjónauppskriftir. Og flestar af þeim eru í Prjóniprjón. Eða réttara sagt: Allar uppskriftirnar í Prjóniprjón eru uppáhaldsuppskriftirnar mínar.... Þær eru allar bara svo spes, hver á sinn hátt.

En ein af Uppáhalds-uppáhaldsuppskriftunum mínum er Þríhyrnan. Sjalið, sem er svo ótrúlega einfalt en fallegt. Sjalið sem er svo íslenskt og hefur svo skemmtilegt sögulegt gildi. Mjög einföld en brilljant hönnun. Bara garðaprjón, með útaukningum í annarri hverri umferð. Við Ragga erum búnar að kenna þessa uppskrift ótrúlega oft. Og það er svo gaman að prjóna þetta sjal! Maður byrjar með örfáar lykkjur undir hnakka að vestfirskum hætti, svo er aukið út jafnt og þétt og sjalið vex í miðju og til hliðanna – soldið einsog galdur hvernig það formast útfrá örfáum lykkjum. Og það er algjör galdur þegar maður fellir af og sjalið sem var allt í kuðli á prjónunum allt í einu sprettur fram fullskapað. Mögnuð upplifun. Hér er lykilatriði að fella laust af. Svo sjalið fái tígulega arma en ekki kreppta. Ég kann pottþétta aðferð til þess að fella laust af – sem hún Halla lopi í Täby kenndi mér. Eða einsog Halla orðar það: „Það er ekki hægt að fella fast af með þessari aðferð“. Sýni það bráðum í myndum hér.

Ef þú ættir að velja einn hlut til að prjóna... prjónaðu þá þessa vestfirsku hyrnu. Þetta þjóðlega, hlýja, einfalda en fallega sjal. Í eistneska Kauni ullargarninu hennar Helgu Jónu í Nálinni – sem kemur svo dásamlega vel út í þessu sjali. Skiptir um lit í rólegheitunum af einhverri eistneskri yfirvegun. Alltaf eitthvað spennandi að gerast í prjóninu. Á sjalinu á myndinni hér að ofan eru tvær gatarendur neðarlega á sjalinu, sem kemur mjög skemmtilega út. Þær er einfalt að prjóna: [prjónaðu tvær lykkjur saman, sláðu bandinu uppá prjóninn], endurtekið út umferðina.

Sjöl prjónuð á þennan hátt voru algeng á Vestfjörðum, og í bókinni Þríhyrnur og langsjöl eftir Sigríði Halldórsdóttur kallast svipað sjal Vestfirskur skakki. Í þeirri bók er mjög skemmtilegur fróðleikur um íslensku sjölin, um það hvernig svona garðaprjónshyrna var ein helsta hlífðarflík íslenskra kvenna hér áður fyrr, notuð í stað peysu. Stundum tvöföld, stundum með gatarönd að neðan til skrauts, og stundum með kögri neðst. Sjalið lá þá yfir axlirnar í kross yfir brjóstið og bundið fyrir aftan bak.

Myndin hér að neðan er úr bókinni Þríhyrnur og langsjöl. Hún sýnir konu með dæmigerða vestfirska hyrnu, tvöfalda með kögri neðst. Barnið á myndinni er Sigríður Halldórsdóttir – sjalabókahöfundurinn sjálfur, ekki meira en nokkurra mánaða gömul, í fangi langömmu sinnar Helgu Jóakimsdóttur sumarið 1930 (upplýsingar frá Herborgu Sigtryggsdóttur, dóttur Sigríðar).

Södermalms-mynstrið = slétt tala!

2008-12-20T01:12:00.000+01:00

Í uppskriftinni "Kragi eða trefill með Södermalms-mynstri" í Prjóniprjón stendur að fitja eigi upp 15 lykkjur - það er rangt! Fitjið upp 16 lykkjur eða aðra slétta tölu, það gengur betur upp...

Elskulega lopapeysa.

2008-12-18T02:44:00.000+01:00

Elskulega lopapeysa.

Þú veist auðvitað að ég hef haft mjög mikið að gera núna undanfarið. Bókin og allt í kringum það. Þú veist líka að ég hefði ekki látið þig svona afskiptalausa ef ég hefði haft einhverja smugu af tíma. En einsog þú hlýtur að skilja er ekkert auðvelt að vera Prjónabókarhöfundur. Prjónabækur skrifa sig jú ekki sjálfar! Og svo er það náttúrulega þetta með hálsmálið á þér.... sem er búið að vera ansi þreytandi. Hálsmálið er jú svo krúsial dæmi, og það er bara einhvern veginn ekki alveg að gera sig með þessu munstri sem ég var að reyna að hanna á brjóststykkið... ekki vel amk. Og ég ætla ekki að láta þetta enda einsog með lopapeysuna þarna með bleika – sem bara... er ekki smart í kringum hálsinn, og þess vegna fer ég næstum aldrei í hana. Vil frekar hafa þetta úthugsað – og vera ánægð með útkomuna. Þú hlýtur að vera sammála mér.

En elskan mín, eigum við ekki bara að gleyma því sem er liðið og horfa fram á veginn ? Við höfum allt að vinna og engu að tapa. Mig virkilega langar til þess að þetta gangi upp hjá okkur. Og ég veit að þig langar til þess líka – innst inni.

Manstu fyrst....? þegar ég keypti ullina í þig hjá handprjónasambandinu á Skóló. Ég brosi bara þegar ég hugsa um það..... :) Ég hef aldrei flýtt mér eins mikið heim til að fitja upp á neinu áður! Vá hvað ég var spennt.... Ég man það var sumar, sólin skein og veðrið var svo yndislegt. Ég varð glöð bara af því að horfa oní pokann... með ullinni í þig, nýkeypta. Svo ótrúlega fallega svört, djúpsvört og yndisleg. Og svo fitjaði ég upp. Prjónfestan var fullkomin, tilfininningin æðisleg... ullin svo mjúk, passlega teygjanleg, smá smá ótrúlega krúttlegar yrjur í ullinni.... og ég sá þig algjörlega fyrir mér, hvernig allt myndi vera, hvítt munstur á ermunum, smá brúnt, í bland við þetta svarta og allt í svona spes stafamunstri sem ég sá í gömlu lopapeysumunstri hjá Höllu lopa. Og ég tók þig með mér útum allt. Prjónaði alltaf eitthvað á hverjum degi, hvar sem ég var, í heimsóknum hér og þar í Reykjavík, og þegar við fórum til ömmu Freys á Akureyri.... Alltaf dró ég þig upp ótrúlega stolt, og lýsti fyrir öllum sem heyra vildu hvernig útkoman ætti að vera.

Svo.... komum við hingað til Svíþjóðar. Sumarfríið búið og svona, nóg að gera í vinnunni. Og ég veit ekki alveg hvað það var.... Það var náttúrulega heitt, ekki beint lopapeysuveður, sem örugglega hafði sitt að segja. Og dagarnir liðu, og ég bara var svo mikið að stússast í öðru.

Ég sé það núna að það var ótrúlegt hugsunarleysi að láta þig bara liggja og bíða. Og þetta með sjalið... það er reyndar ekki neitt til að gera mál útaf – enda var það ekki neitt neitt. Í fyrsta lagi var þetta pínkulítið sjal, í mesta lagi 40 umferðir, semég prjónaði úr einhverri blöndu af mohair-garni. Eitthvað hundómerkilegt. Og ég nota það aldrei. Það bara datt í mig að prjóna það af því ég rambaði inn á einhverja síðu á netinu með svipuðu....en æ það var hálfglatað. Svona eftirá skil ég ekkert í mér. Og hitt.... mig vantaði jú vettlinga þarna um haustið, og húfan var fyrir bókina. Ekkert flóknara en það.

En svo skellti ég mér nú í að prjóna ermarnar á þig þarna um jólin. Það var nú ekki lítið hvað það gekk hratt! Og brjóststykkið, það beinlínis rann af prjónunum, vá þá var gaman. Og – ég verð að segja þér – ég hef lykkjað saman bol og ermar á mörgum peysum – en með þér var það ótrúlega spes. Þetta var bara einsog samruni... tveggja fljóta. Eitthvað svo náttúrulegt. Í dag sést t.d. ekki baun að þetta sé lykkjað saman.

En svo var það þetta með hálsmálið. Það bara var ekki að ganga upp. Og auðvitað var ótrúlega lýjandi að reyna og reyna og þurfa alltaf að rekja allt upp... Þú veist ég þoli ekki að rekja upp!

En núna langar mig bara svo til þess að allt verði gott aftur. Ég veit þetta á eftir að geta gengið upp hjá okkur – og ég veit að ég get gert þig ótrúlega spes.... Ég er búin að teikna hálsmálið almennilega upp, ég veit þetta getur gengið með aðeins færri lykkjum, og auðvitað er ég til í að hafa einhverja svipaða uppskrift til hliðsjónar. Ég VEIT að ég get þetta! Og ef ég redda þessu með hálsmálið – þá er þetta jú eiginlega komið! Þá er bara rennilásinn eftir – og það er pís of keik – ég lofa... hef oft sett svoleiðis í.

Ég segi elskan, gefum þessu séns – ég veit við getum þetta. Útkoman á eftir að verða æðisleg....
Ég sakna þín og hlakka til endurfundanna,
Þín – Halldóra.

Knit or die !

2008-12-16T19:28:00.000+01:00

Sumir taka prjónið há-alvarlega. Þessi var á íslenska prjónakaffinu í Stokkhólmi nú síðast..... :-)

Þjóðleg jólasería

2008-12-15T17:40:00.000+01:00

Jæja elskurnar, er ekki kominn tími til að piffa uppá gömlu jólaseríuna? Þetta er ágætt að dunda sér við, hekla 1-2 blóm á kvöldi :-) - úr léttlopa-afgöngunum.

Uppskriftin er hér að neðan, klikkaðu á myndina þá stækkar hún. Blómin eru svo bara þrædd á jólaseríuna (sem einmitt er svo tómleg og var bara að bíða eftir lopablómunum þínum). "Stilkurinn" á ljósunum ætti að vera það langur að blómið nái ekki í peruna - en annars er lopinn ekki svo eldfimt efni. Ef opið í miðjunni er of þröngt fyrir stilkinn á þinni seríu geturðu prófað að hafa það aðeins stærra - gera 1-2 fleiri loftlykkjur í upphafi.

Vantar þig að læra undirstöðurnar í að hekla? Garnstudio er til dæmis með heklkennslu á ensku eða norðurlandamálunum. Hér sérðu í máli og myndum hvernig loftlykkjur eru heklaðar, stuðull (neðri myndin: treble crochet), hálfstuðull (half treble crochet) og fastalykkja.

Klikkaðu á myndina - þá stækkar hún.

Ragga prjóniprjónar í Lesbók Sunnudags-Moggans

2008-12-13T20:49:00.000+01:00

Kíkiði í Lesbók Sunnudags-Moggans í dag, þar er viðtal við Röggu um töfrana við prjónið, prjón sem iðjuþjálfun, prjónamorð með fingravettlingum, prjónafrelsi, prjónafagnaðarerindið og margt fleira..... og Prjóniprjón auðvitað.

Ég sit hér í eldhúsinu mínu í Sveppaskógi í Stokkhólmi og var að lesa viðtalið á netinu. Það er kvöld. Koldimmt úti... enginn snjór... en fullt af jólaljósum alls staðar í gluggum nágranna minna (nema náttlega hjá múslímunum útá horni).... Kósíkósí...

Best að prjóna nokkrar mjúkar og róandi lykkjur fyrir svefninn.
:-)

(PS. Að lesa Sunnudags Moggann á laugardegi.... minnir mig á þegar Elena spænsk vinkona mín á Íslandi sá Sunnudags-Moggann í póstkassanum hjá sér á laugardagskveldi og spurði - réttilega: "WTF!? Hvernig er hægt að prenta dagblað með fréttum morgundagsins í dag....!?!".)

Myndir úr Prjóniprjón

2008-12-13T01:10:00.000+01:00

Á Facebook er Prjóniprjón-síða þar sem sjá má eitthvað um 20 myndir úr bókinni, og nú eru líka komnar Prjóniprjón-myndir á Flickr - sjá hér til hliðar.
Svona fyrir forvitna.... :-)

Hvernig bók er Prjóniprjón ?

2008-12-11T20:29:00.000+01:00

Já hvernig bók er þetta eiginlega...?
Prjóniprjón – litla prjónabókabeibíið okkar á að vera svo margt.... Hún á í fyrsta lagi að vera skemmtileg prjónabók sem á að fá þig til að langa til að prjóna. Annað hvort uppskriftirnar beint uppúr bókinni, eða eftir þínu eigin höfði. Flestar uppskriftirnar í bókinni eru einfaldar, og bjóða uppá marga möguleika í sambandi við að aðlaga og breyta, og að gera prjónið persónulegt, eða „sérhannað“.

Prjóniprjón er skrifuð svona á léttu nótunum - með húmor og lifandi texta – ekki bara þurrar uppskriftir. Í bókinni leynist líka ýmislegt annað sniðugt – einsog reynslusaga aðstandenda langt leiddrar prjónakonu, og mataruppskrift fyrir prjónara sem bæði sparar tíma (sem þá má nota í að prjóna auðvitað) og peninga (sem þá má nota til að kaupa garn auðvitað). Og svo er hægt að neyta þessa matar á meðan prjónað er :-) ! Í bókinni eru líka nokkrir sögulegir fróðleiksmolar um prjón á Íslandi. Vissuð þið til dæmis að prjónles var ein helsta útflutningsvaran á Íslandi hér áður fyrr, og að þegar mest var voru flutt út 280 þúsund pör af vettlingum árið 1806....!?! Við erum að tala um aaaansi margar prjónaðar lykkjur þar....

Já, hugmyndirnar í sambandi við bókina voru margar – en fyrir rest ákváðum við að spara plássið og hafa gleðina sem mesta (meiri prjónauppskriftir), enda var jú aðalatriðið að deila gleðinni og breiða fagnaðarerindið út til sem flestra.

Textinn í henni á líka að vera einfaldur og auðskiljanlegur – engar skammstafanir útum allt: semsagt ekkert svona: prj. 2 l sl., 2 l br. og prj. svo 2 l s. (prjónauppskriftir geta nú verið nógu þreytandi þó svo maður þurfi ekki að stauta sig í gegnum alls konar styttingar líka!).

Hér kemur bútur úr innganginum í bókinni til að upplýsa frekar um uppskriftirnar í henni:
„Í Prjóniprjón eru verkefni sem henta bæði byrjendum sem og þaulvönum prjónurum. Þá sem eru lengra komnir í prjónagleðinni viljum við hvetja til prjónafrelsis. Að brjótast úr viðjum uppskriftanna og þora að prjóna sjálfstætt, því það er svo miklu skemmtilegra! Að finna að maður hafi vald á prjónunum og því sem á að skapa – en ekki öfugt. Töfraorðið hér er prjónfesta og að öðlast skilning á henni. Frjáls og fríhendis verkefni þurfa helst að vera einföld í byrjun en smám saman öðlast prjónarinn tilfinningu og trú á sjálfan sig til að takast á við flóknari verk. Og það er von okkar að prjónarar noti ekki aðeins uppskriftirnar í bókinni heldur breyti þeim og bæti og noti til innblásturs - falleg húfa getur kveikt hugmynd að enn fallegri peysu. Svoleiðis prjón er frábært!

Fyrir utan að predika fagnaðarerindi prjónafrelsisins höfum við safnað saman í þessa bók ýmsum uppáhaldsuppskriftum. Ekki öllum þó, þær komust hreinlega ekki fyrir... Og það var erfitt að velja – trúið okkur... Þetta eru uppskriftir sem við prjónum og kennum aftur og aftur. Uppskriftir sem hægt er að breyta og þróa því þær eru svo einfaldar, skemmtilegar, snilldarvel hannaðar, eða allt þetta. Hér eru líka öðruvísi, litríkar og frumlegar uppskriftir, og uppskriftir sem eiga að hvetja til
innblásturs. Eitthvað fyrir alla! Sumar eru ekki gefnar í mörgum stærðum, en hafirðu frelsast úr viðjum uppskriftanna er hægt að aðlaga þær að hvaða stærð sem er. Byrjaðu á minni og einfaldari uppskriftum og fetaðu þig svo áfram eftir prjónafrelsisstígnum.“

Einmitt.... Ég vona að þið hafið orðið einhvers vísari um bókina. Svo setjum við fleiri myndir úr henni hér inn von bráðar.

PS. Horfði á Mamma mia í gær með stelpunni minni – og við sungum með hástöfum allan tímann.... !!! Húsbandið á heimilinu fékkst sko ekki til að horfa með okkur. Við vorum að reyna að kalla hann inn í stofu með hvatningarorðum einsog: „Komdu!... láttekkisona!... Bring out the gay in you!...“. En allt til einskis. En hann rétt náði þó að sjá Pierce Brosnan bresta útí söng einu sinni og hafði þá þetta til málanna að leggja um það: 1. „Dísös kræst“. 2. „HVAÐ eru þessir menn búnir að láta hafa sig út í?!“ 3. „Ég verð að fara, þetta er að eyðileggja svo margar aðrar myndir fyrir mér“.

Var einhver að tala um heitar lummur..!?!?!

2008-12-10T22:15:00.000+01:00

Jibbí... Prjóniprjón rennur út einsog heitar lummur !!!
En hafið ekki áhyggjur - það verða prentaðar fleiri :-)

En ótrúlega skemmtilegt og frábært hvað bókinni hefur verið vel tekið. Og kannski verða bara allir prjónandi út um allt næst þegar ég kem til Íslands (yeah right... !), og allt bara uppúr Prjóniprjón (eimmit), og hún uppí hillu á hverju heimili (sure), og ég get bara hætt að vinna í fiskunum einsog Ragga kallar það (dream on).....!!!!!!!!!!

"Soldið þjóðleg, öðruvísi, fyndin, einföld, sniðug, skemmtileg og flott" er það sem ég hef fengið að heyra um bókina. Og líka þetta: " Hey, svona gæti ég prjónað!" - bæði frá byrjendum - og lengra komnum. Allt lætur þetta sem ljúfur fuglasöngur í mínum eyrum... :-).

Þar að auki predikum við "prjónafrelsi" - að feta sig áfram eftir prjónafrelsis-stígnum, sem þýðir að fylgja ekki endilega uppskriftum og lykkjufjöldum í blindni, heldur að vinna útfrá prjónfestunni... (Þetta er nú efni í heila færslu - og ég er aaaaakkúrat að fara að horfa á Mamma mia með elstu stelpunni minni - ég veit - ein doldið mikið á eftir í bíómyndunum!).

En skemmtilegast þykir mér hvað fólki líst vel á að gefa bókina í jólagjöf - og ég get ekki annað en verið sammála - þetta er hrikalega krúttleg jólagjöf!
:-)

Ykkar hógværi prjónabókaútgefandi,
Halldóra.

Þess vegna þarftu að gera prjónfestuprufu...

2008-12-09T16:02:00.000+01:00

Í Prjóniprjón er litlu plássi eytt í prjónakennslu en eitt kennum við þó... og það vel, en það er að gera prjónfestuprufu. Reyndar er svoleiðis óþarfi fyrir mörg verkefnanna í bókinni, t.d. sjöl, trefla og önnur minni stykki - og mörgum prjónurum dettur ýmislegt í hug sem þeir væru frekar til í en að gera prjónfestuprufu, t.d. að fara í rótarfyllingu hjá tannsa, þrífa efri skápana, fara í brasilískt vax, borða bara sviðaaugu í heila viku eða tannbursta villikött. Þetta er samt mjög nauðsynlegt í vissum tilfellum t.d. ef maður ætlar að prjóna peysu úr ógeðslega dýru garni og vill að hún passi á fyrirfram ákveðinn líkama. Myndin hér segir meira en milljón orð í viðbót - fann hana á fyndnasta prjónabloggi í heimi sem birtir bara ljótar og asnalegar prjónaflíkur. Ég sit hér og gleðst yfir því að einhver noti tíma sinn í að prjóna kjánalegar flíkur sem koma manni til að hlæja... það er aldrei fitjað upp til einskis!

Jesús minn hvað hún er falleg......

2008-12-07T19:18:00.000+01:00

Það var hátíðleg stund þegar ég fékk eintak af Prjóniprjón í hendurnar á föstudaginn var. Bróðir hennar Lóu hafði tekið fyrstu eintökin með sér hingað til Stokkhólms – glóðvolg úr prentuninni. Oh, hvað hún var flott!! Pappírinn svo þykkur og fínn – og gormurinn.... stór og æðislegur. Vá. Forsíðan geggjuð.... og uuunaðslegt að strjúka yfir síðurnar!!! Og prjónauppskriftirnar hrikalega girnilegar allar saman – mig langar að prjóna þær allar strax – aftur....
Meiriháttar.

Það er eins með allar fæðingar, þrátt fyrir erfiðar hríðar og langdregna meðgöngu – þá gleymist allt neikvætt - hverfur einsog dögg fyrir sólu um leið og þú færð krílið í hendurnar :-).

Ragga sat annars í Mál og menningu á Laugaveginum í dag og prjónaði - bókabúðagestum og sjálfri sér til ánægju og yndisauka. Eins og jólasveinninn í ameríku í mollunum um jólin spurði ég? "Já já, fólk getur bara komið og sest og prjónað með mér" svaraði Ragga glöð í bragði :-). Svo verður hún í smá spjalli í morgunútvarpi Rásar 1 kl. 7.15 á morgun mánudag, og í Fréttablaðinu á þriðjudag.
Meira prjón meiri gleði !!

Fyrsta eintakið...

2008-12-05T12:46:00.001+01:00

skellti sér á prjónakaffi og hér er sönnun þess.

Bók í hönd

2008-12-05T12:29:00.001+01:00

Ragga er á Íslandi og Halldóra í Svíþjóð... þess vegna var beint símasamband milli landanna í gær um fimmleytið þegar fyrstu bækurnar runnu ljúflega út úr prentvélinni. Bókin er yndisleg og frábærlega vel heppnuð og fékk æðislegar viðtökur á risaprjónakaffi Handprjónasambandsins í gærkvöldi.

Útgáfugleðin Íslandsmegin byrjar eftir nokkra klukkutíma en það vill svo skemmtilega til að samningar hafa náðst við dagfarsprúða drenginn með gyllta makkann, Högna Egilsson úr hljómsveitinni Hjaltalín. Hann ætlar að mæta í Nálina og troða upp með gítarinn sinn og glóðvolga söngtexta um prjón, frelsi og hamingju!

Útgáfugleði !

2008-12-03T17:57:00.000+01:00

Í tilefni útkomu Prjóniprjóns verður haldin útgáfugleði beggja vegna Atlantshafsins.... (við erum mjög cosmó) !

Verið hjartanlega velkomin að fagna útkomu bókarinnar með okkur:

- í Nálinni, Laugaveg 8, föstudaginn 5. desember kl. 17.30 - 19 undir stjórn Röggu,

- Og/eða í íslenska prjónakaffinu í Stokkhólmi á Café NoCo, Odengatan 47 laugardaginn 6. desember kl. 10 - 13 - undir stjórn Halldóru.

Sjáumst með prjónana !

Magadans og prjón

2008-12-02T19:35:00.000+01:00

Prjón og magadans fer ágætlega saman.
Eða gerði það allavega um síðustu helgi, þegar Ragga var stödd hér í Stokkhólmi og narraði íslenska saumaklúbbinn með sér á Cave de roi - mjög sérstakan Líbanskan veitingastað í Huvudsta centrum í Solna í NV Stokkhólmi. Það var nú ekki útaf prjónabókarsamvinnu sem Ragga var á ferð hér (við erum ekki orðnir þvílíkir metsöluhöfundar að við höfum ráð á svoleiðis – ennþá !) – en auðvitað notuðum við tækifærið til að hittast og fara yfir stöðuna á prjónabókarbeibíinu okkar.

„Þetta er mjög speisaður staður, þú sérð strax fjólubláa ljómann úr gluggunum“ sagði Lóa vinkona sem var að reyna að lýsa hvernig ég fyndi þennan líbanska veitingastað. Og fjólublátt var það ójá. Mjööög spes útfjólublá lýsing sem sást langar leiðir utanfrá. Virtist eiga uppruna sinn í og við barinn sem by the way náði yfir heilan vegg. Fjólublátt ljós við barinn öðlaðist þarna nýja merkingu fyrir mér.

Þjónarnir tóku hjartanlega á móti okkur og nefndu það við hvern og einn gest að staðurinn væri sko nýfluttur í þetta húsnæði – og hefði ekki tekið neitt með sér frá gamla staðnum – EKKI NEITT MEÐ - nota bene – ALLT NÝTT, tíunduðu þeir stoltir. Síðar kom í ljós að þeir höfðu allavega ekki tekið posavélina sína með sér, því það var varla hægt að borga með kortum þarna. Eða réttara sagt – þegar kom að því að borga var fyrst sagt að kortavélin væri ónýt, en jú svo var það hægt, og kortunum var safnað saman í haug og svo hvarf eigandinn með öll sem eitt og var dágóða stund í burtu.... Hmmm, spúkí. Gamli staðurinn var sko um 25 metra í burtu, staðsettur inní verslunarmiðstöðinni í Huvudsta centrum – með útsýni útá næstu búð. En nú voru þeir komnir út fyrir, með útsýni á bílastæðið. Allt annað líf.

Við vorum mjög kátar að hittast þarna aftur eftir nokkurt hlé og Ragga ætlaði strax að draga upp prjónana sem var jú mjög viðeigandi í þessum félagsskap – en Ecoloco Lóa (til aðgreiningar frá hinni Lóu) lét hana pakka því niður því nú skyldi sko etið. Fyrst allavega.

Einhver okkar spurði um matseðil, en þjónninn hváði bara við því: „Matseðil? Til hvers, þú færð alveg nægan mat hér.“ Og skýrði út fyrir okkur að það vær boðið uppá 15 mismunandi smárétti – og að það væri maturINN hér. Meze, var semsagt á boðstólum og ekkert annað. Og svo kom í ljós að það var alveg rétt – við fengum alveg nægan - og sjúklega góðan mat. Við héldum að þeir ætluðu aldrei að hætta að bera í okkur réttina, Nammi namm ótrúlega gott. Svo var skýrt út fyrir okkur að kaffið væri ókeypis ef við dönsuðum eftir matinn – þegar magadansmærin væri komin....! Ótrúlega fyndið... og síðar kom í ljós að liðið á staðnum var líklegast mjög kaffiþyrst því um leið og Habiba músíkin (einsog Ragga kallar hana) byrjaði, brustu allir viðstaddir hreinlega út í magadans !!!! Mjög spes að sjá. Bæði ungir sem aldnir, ungar píur, gamlar konur, gamli feiti frændinn – OG m.a.s. ungabörnin á svæðinu voru dregin á dansgólfið. Músíkin er svona mjög sérstök taktföst „arabísk“ dansmúsík, mjög skemmtileg. Og Allir kunnu textana og sungu með.

Við vorum greinlega staddar á mjög vinsælum stað - meðal "innfæddra". Allir dökkir á brún á brá og komu nokkuð arabískt fyrir sjónir.
Nokkur atriði sem við tókum eftir að við þyrftum helst að vera búnar að útvega okkur áður en við förum þarna næst til að falla betur í hópinn. Píuhópinn sko – og þær voru ekkert smá flottar píurnar þarna. En allavega, lágmarksgræjur eru: Háhælaskór með 8cm hælum – minnst. Hárlenging – er möst. Og svo svona kjóll sem er svo stuttur og svo opinn á bakinu að maður veltir fyrir sér hvort þetta sé kannski sundbolur..... I kid you not. Þeir voru Ótrúlega stuttir. Við spurðum hvor aðra: hvar fást svona föt eiginlega?!? Í Kiss í Kringlunni svaraði Ragga að bragði, enda lífsreynd kona. Svo sýndist okkur mjög gott að vera með gervineglur og gerviaugnahár líka.

Ef maður hins vegar vill vinna á staðnum, þá sýndist okkur að til að falla inn í þann hóp þarf:
Að vera íturvaxinn (velútilátinn) karlmaður. Með þykkt yfirvaraskegg. Mjög þykkar augabrúnir – helst einsog der á derhúfu. Allur líkamshárvöxtur virðist vera af hinu góða – hef aldrei séð jafnmarga jafnloðna karlmenn samankomna á einum og sama stað. Og svo náttúrulega þarftu að tala arabísku hátt og með miklu pati.

Önnur lenska sem kom okkur arabískt fyrir sjónir var að liðið pantaði sér vodkaflösku á borðið – bara eina absolut á borðið tack så mycket.... og drakk það í bland við einhvers konar orkudrykki. Samt var enginn drukkinn að sjá. Að vísu fórum við snemma – ég þurfti að fara fyrr en ég hefði viljað, heima var dóttirin Unnur Sóldís 4.5 mánaða með pabba og pelanum í fyrsta skiptið – og var greinilega ekki ánægð með það...
En allavega - þetta var frábær kvöldstund, við Ragga fengum margar hugmyndir að prjóni - að stuttum og fljótunnum flíkum... :-)

Sunnudaginn notuðum við svo til að fara yfir efnið í prjónabókinni – phew..... ég hlakka nú bara til þegar maður getur bara farið að prjóna einsog eðlileg manneskja þegar maður hefur lausa stund... ho ho ho

Hlaut að vera...

2008-11-30T23:51:00.000+01:00

Garðaprjónspeysa - ég elska þig

2008-11-28T11:58:00.000+01:00

Eitt það skemmtilegasta við gera þessa prjónabók var að safna saman öllum uppáhaldsuppskriftunum í hana – ásamt öðru smálegu og góðu. En það erfiða hefur verið að skrifa þær niður og koma orðum að hlutunum.... úff !!!

Garðaprjóns-barnapeysan er ein af mínum aðal- uppáhaldsuppskriftum. Ég elska hana ! Hún hefur allt sem ég elska, dái og dýrka í prjóni. Í alvöru. Ég sá þessa uppskrift fyrst hjá Stínu vinkonu, fyrrum nágranna mínu hér í Svíþjóð. Mamma hennar og handavinnufrömuðurinn Hildur Sigurðardóttir hafði sent henni garn og uppskrift í tilefni þess að hún ætti von á fyrsta erfingjanum. Og við Stína hjálpuðumst að með peysuna og í fyllingu tímans klæddi hún Stefán litla í hana – ótrúlega stolt. Þessi upphaflega uppskrift er því miður glötuð, en hér um daginn rakst ég á post-it miðann (!) sem ég hef skrifað niður centimetra og lykkjufjölda í mismunandi garntegundum, sem ég hef notað við að prjóna svipaða peysu nokkrum sinnum; mismunandi pennalitur fyrir mismunandi peysu, allt skrifað hvað ofaní annað.... ! Óskiljanlegt fyrir nokkurn annan en mig.....

En allavega, ég ætla að segja ykkur af hverju þetta er uppáhaldsprjónauppskrift hjá mér.

1. Hún er einföld. Engin tilgerð, ekkert flókið munstur, bara stílhrein og útreiknanleg. Í alvöru talað – hvað eru margar peysuuppskriftir sem þú getur lagt á minnið....? Það er nú útaf sentimetrafjöldanum sem er svo einfaldur, ég hef þetta aðlagað þannig að það eru bara annað hvort 20 eða 30 sentimetrar sem þarf að muna (!) Og jú hálsmálið, en það er mjög útreiknanlegt. Uppskriftin er svo einföld að það er nóg að teikna hana upp til að muna og átta sig á hvað kemur næst.

2. Þessa uppskrift er ekkert mál að aðlaga að uppáhaldsgarninu þínu eða því garni sem þú fellur fyrir í búðinni. Það er bara að gera prjónfestuprufu fyrst (útskýrist í bókinni).

3. Upplagt fyrir sköpunargleðina. Gaman að skjóta inn röndum hér og þar – ef maður er í þeim gírnum. En einlit er líka stílhrein og flott.

4. Sjúklega skemmtileg hönnun: peysan er öll prjónuð í einu stykki, ermar og allt saman. Ótrúlega sniðugt og þægilegt.

5. Garðaprjónið - það er bara garðaprjón í þessari peysu. Og garðaprjónið er bara eitthvað svo hlýlegt og krúttlegt... Gamaldags, heiðarlegt prjón, engir útúrsnúningar, engin látalæti. Back to basics.

6. Þessi peysa vex með barninu. Án gríns ! Fyrst þegar barnið er lítið brettir maður upp ermarnar og peysan er svolítið kápuleg, en svo fer ótrúlega fljótt að fyllast útí hana og maður þarf ekki að bretta eitt eða neitt. Garðaprjónið er líka svo ótrúlega teygjanlegt. Þú þarft ekki að prjóna neina aðra „utanyfirpeysu“ á barnið fyrsta árið – þetta er THE peysa á litla barnið. Og svona hnepptar peysur eru bestar, sem ekki þarf að troða yfir höfuðið.

Eftir þessa lofræðu gat ég ekki lengur á mér setið og rauk útí búð til að kaupa garn í svona peysu á nýju snúlluna mína. Skil reyndar ekki af hverju ég er ekki fyrir löngu búin að fitja upp á einni slíkri handa henni! Fyrir valinu varð Drops alpacka í fölbleikum lit. Hafið mig afsakaða, verð að fara að prjóna....

Verði ljós

2008-11-26T17:29:00.000+01:00

Ja, nú væri aldeilis gott að geta prjónað sér kertastjaka, svona í skammdeginu sem er skollið á.....

En örvæntið ekki, það verður öllum kleift þegar Prjóniprjón er komin út, þar er nefnilega uppskriftina að finna :-).

Að tjaldabaki prjónabókar...

2008-11-23T23:34:00.000+01:00

Frú Ragnheiður hefur lengi verið svag fyrir fallegu garni, og hér til hægri á efstu myndinni liggur hún alveg kylliflöt...

Enda ekki að undra, sjáiði garnið!? Þvílíkir litir... þvílík áferð... þvílík mýkt.... þvílíkt girnilegar myndir !!! (Vill einhver halda mér áður en ég rýk til og fitja upp.... bara á einhverju!).

Lundalínan

2008-11-20T18:00:00.000+01:00

Þessa prjónauppskrift og margar fleiri í sömu línu er að finna í væntanlegri jólaprjónabók ársins.
(NOT!)

Þokkafullt prjón

2008-11-18T21:26:00.000+01:00

Hvað næst? Var ég spurð í boði um helgina. Prjónabók er kannski ekki í fljótu bragði eðlilegt framhald af skrifum um kynlíf og nautnir. Og þó! Ákveðnar hliðstæður eru til staðar, amk varðandi viðhorf iðkendanna. Margir sem prjóna festa sig í reglur, uppskriftir og formlegheit á meðan aðrir gefa sig sköpunargyðjunni á vald og prjóna það sem hugurinn girnist. Svoleiðis er líka kynlíf. Margir eru uppteknir af "reglum" og "eðlilegum athöfnum" á meðan hinir gefa sig skapandi nautnum á vald. Ég veit amk hvora leiðina ég vel - í báðum tilvikum sko... Ég gúglaði sexy knitting og fann myndina... Skapandi!

Húrra fyrir hægra heilahvelinu!

2008-11-18T10:49:00.000+01:00

Sumir skilja ekkert í þessu. Hvernig hægt er að vera svona gagntekinn af prjóni, bæði andlega og líkamlega. Stundum sofna ég varla fyrir nýjum prjónahugmyndum sem æða í áttina að mér og halda fyrir mér vöku. Mér finnst þetta auðvitað mjög skiljanlegt. Tala nú ekki um ef ég hef heimsótt girnilega garnbúð sama dag, eða bara þuklað á eigin birgðum góða stund. Áferðin og litirnir síast inn í heilann og fingurna og hugmyndirnar byrja fyrr en varir að spretta fram. Áskorunin felst svo í að koma þessu út í heiminn, að skrifa niður, teikna eða bara byrja að prjóna. Þetta táknar líklega að hægra heilahvelið sé einstaklega virkt hjá mér um þessar mundir. Tékkið á myndinni hér að neðan. Ef þið getið sagt litinn á orðunum upphátt án vandræða er hægra heilahvelið ríkjandi - ef þið eigið erfitt með það og viljið heldur lesa orðin er vinstra heilahvelið virkara. Held að blanda af báðum sé best!

Prjónabókin sem fæddist í Stokkhólmi

2008-11-16T19:28:00.000+01:00

Við Ragga eeelskum að prjóna, og höfum prjónað mikið saman um dagana. Við kynntumst í Stokkhólmi þegar við vorum báðar búsettar þar, en nú er Ragga flutt til baka til fósturjarðarinnar, og sameiginlegum prjónastundum hefur fækkað nokkuð....

Við hittumst oft hér í Stokkhólmi og ræddum prjón og uppskriftir og létum okkur dreyma um að skrifa eigin prjónabók. Á íslensku, með einföldum og skemmtilegum prjónauppskriftum "á mannamáli" sem myndu hvetja prjónara til dáða...... :-)

Nú er draumurinn að rætast, því prjónabókin okkar Prjóni prjón fer að koma út !!! Hana verður hægt að nálgast í garnbúðinni Nálin á Laugavegi, og með því að panta hana hjá prjoniprjon@gmail.com - til afhendingar á Íslandi og í Svíþjóð.

Hér eru tvær myndir úr bókinni:

Þýðing á enskum prjónahugtökum

2008-11-15T18:53:00.000+01:00

Netið er yfirfullt af spennandi prjónauppskriftum og prjónabloggum sem gaman er að fylgjast með og fá innblástur af. Uppskriftirnar eru jú yfirleitt á ensku, en það ætti ekki að stoppa neinn. Bæði er hægt að kíkja í orðabækur, spyrja í garnbúðum, eða á prjónakaffinu til dæmis.

Hér að neðan er þýðing á helstu orðum og prjónahugtökum úr brókaruppskriftinni hér á undan.

skein - hnykill
size US6 circular needles - 4 mm hringprjónar
Stitch - lykkja
stitch marker - prjónamerki
tapestry needle - nál til að ganga frá endum
17-24" elastic waist band - 43-60 cm teygja í mitti
Gauge - prjónfesta
sts = stitches - lykkjur
rows - umferðir
1" sq = 1 tommu reitur - 2.5 x 2.5cm reitur
Cast on - fitjið upp
garter stitch - garðaprjón
stockinette stitch - slétt prjón
Decrease row - fækkunarumferð/umferð þar sem lykkjum er fækkað
k2 = knit 2 - prjónið 2 lykkjur
K2tog = knit 2 together - prjónið 2 lykkjur saman
ssk = slip, slip, knit - færið 2 lykkjur óprjónaðar yfir á hægri prjón, prjónið þær saman
repeat decrease row every 6 rows - endurtakið fækkunarumferðina í sjöttu hverri umferð
bind off - fellið af
scrap yarn - aukaþráður
join to work in the round - tengið og prjónið í hring
yo = yarn over - slá uppá / bregðið þræðinum um prjóninn
round - (hring)umferð
make 1 - aukið út um 1 lykkju
strand - þráður
purl - prjónið brugðna lykkju
bind off loosely - fellið laust af
Overlap fyrst and last inch of elastic - látið 2.5 cm af byrjun og enda teygjunnar liggja yfir hvor öðrum
twisted cord - snúið band
braided cord - fléttað band
crochet chain - heklið band
32" - 80cm

Yndislegar brækur

2008-11-15T18:40:00.000+01:00

Rakst á þessar yndislegu brækur á prjónablogginu bitterpurl. Lýsir upp Nóvembermyrkrið svo um munar !!

Uppskriftina er að finna á The blue blog. Uppskriftin er á ensku, en látið það ekki stoppa ykkur. Hér að ofan er birt þýðing á helstu prjónahugtökunum í uppskriftinni, og ef það hjálpar ekki má alltaf prófa að senda tölvupóst á prjoniprjon@gmail.com og leita ráða.

Prjónakennsla

2008-11-14T23:16:00.000+01:00

Ef þú þarft að rifja upp grunnatriðin í prjónaskapnum er nóg af kennsluefni á netinu. Við leit að íslensku efni rakst ég til dæmis á "Prjónakennsluvef Arndísar" þar sem sýnt er með mjög skýrum myndum hvernig á að fitja upp, prjóna, fella af og fleira.

Garnstudio er með þýðingar á prjónahugtökum, mjög hjálplegt við erlendar uppskriftir.

Að prjóna er soldið einsog að hjóla, ef maður hefur einhvern tíman lært það situr það þarna "einhvers staðar inni", og það er bara að komast í gang.

Þannig að... dragðu fram garnið og prjónana og prófaðu. Og mættu svo í prjónakaffi til að fá frekari aðstoð eða almennan prjónainnblástur. Í Nálinni á Laugavegi er bæði prjónakaffi, og líka boðið uppá ýmis konar námskeið fyrir byrjendur sem lengra komna - svona ef prjónakennsla í gegnum netið er ekki að virka fyrir þig.

Ertu með frekari ábendingar um prjónakennslu á netinu? Láttu okkur vita!

Prjóni prjón á bloggið!

2008-11-13T17:22:00.000+01:00

Jæja, þá erum við komnar saman á bloggið, Ragga og ég. Og hér verður sko bara bloggað um skemmtilega hluti, nefnilega Prjón. Af öllum stærðum og gerðum og útgáfum. Og smá hekl líka, af því það finnst okkur líka skemmtilegt.

Við elskum að prjóna..... Það er bara svo skemmtilegt og skapandi og gefandi. Að sjá eitthvað vaxa bókstaflega úr höndunum á manni - og helst náttúrulega verða að einhverju :-). Að ég tali nú ekki um tilfinninguna við að skapa hluti með notagildi, eitthvað sem hlýjar og klæðir. Eitthvað sem hægt er að gefa, prjónuð flík er mjög sérstök gjöf - ást og umhyggja í hverri lykkju.

Svo er svo róandi að prjóna. Að í rólegheitunum prjóna lykkju fyrir lykkju fyrir lykkju, er hæfilega einhæft verkefni sem leyfir huganum að reika á meðan maður vinnur verkið. Jafnast á við bestu hugleiðslu.

Við erum báðar mikið fyrir "frelsi" í prjónaskapnum, þ.e. að einblína ekki bara á lykkjufjöldann, heldur á það að skapa sjálfur og prófa sig áfram með eigin "hönnun". Það getur verið bæði í s.b. við litaval eða form - og er miklu skemmtilegra en að bara fylgja uppskriftinni í blindni. Það krefst þó smá reynslu og sjálfstrausts - en það kemur með tímanum.

Þessu og ýmsu öðru varðandi prjón langar okkur semsagt að deila með okkur; Prjón, frelsi og hamingja fyrir alla !

Bestu kveðjur,
H.